Vijai Sardesai : सिद्धी नाईक खून प्रकरण, त्यानंतर सोनाली फोगट खून प्रकरण आणि आता कुडचडेतील गोळीबार. ही मालिका पाहता गोव्यातील कायदा व सुव्यवस्था पूर्णपणे ढासळली असल्याचे सिद्ध होत आहे. त्यामुळे आता डॉ. प्रमोद सावंत यांनी गृहमंत्री पदावरून पायउतार होणेच योग्य ठरेल, अशी टीका गोवा फॉरवर्डचे अध्यक्ष विजय सरदेसाई यांनी केली आहे.

याप्रकरणी आता पंतप्रधान नरेंद्र मोदी यांनी हस्तक्षेप करावा, अशी मागणी विजय सरदेसाई यांनी केली आहे. कुडचडे येथे बेकायदेशीर वाळू व्यवसाय चालतो, त्याला पर्यावरणमंत्री नीलेश काब्राल यांचा आशीर्वाद असल्याचा आरोप काँग्रेसचे प्रदेशाध्यक्ष अमित पाटकर यांनी केला आहे.

बाणसाय कुडचडे येथे वाळू माफियांच्या गोळीबारात परप्रांतिय कामगाराचा खून झाल्याची खळबळजनक घटना घडली आहे. मृत कामगाराचे नाव युसुफ आलम (23, राहणार झारखंड) असे असून या हल्ल्यात महमद साहू (33) हा कामगार गंभीर जखमी झाला. त्याच्यावर गोमेकॉत उपचार सुरू आहेत. तर एक जण हल्ल्यातून बचावला.

पोलिस अधिक्षक सॅमी तावारीस यांनी सांगितले, की बुधवारी मध्यरात्री दीड वाजता बाणसाय कुडचडे येथे झुवारी नदीच्या फाट्यात बेकायदेशीररित्या रेती काढण्यासाठी तीन कामगार बोट घेऊन जात होते. नदीपात्रातून जात असताना अज्ञातांनी अंधाराचा फायदा घेऊन नदीच्या काठावर राहून अगदी जवळून बंदुकीच्या गोळ्या झाडल्याने युसूफ आलमचा जागीच मृत्यू झाला. दरम्यान, या घटनेमुळे ग्रामस्थ संतप्त झाले असून अवैध रेती उत्खननावर बंदी घालण्याची मागणी होत आहे.