पणजी: गोव्याला काजू आणि नारळ या दोन्ही पिकांसाठी ओळखले जाते. काजू उत्पादनापासून फेणी बनविली जाते, जिला फेणी ‘गोव्याची राणी’ असेही संबोधले जाते. परंतु मागील चार-पाच वर्षांपासून काजू उत्पादक शेतकरी, काजूगर व्यावसायिकांसोबतच फेणी उत्पादनावर अंबलंबून असलेल्या शेतकरी तसेच व्यावसायिकांनाही मोठ्या प्रमाणात नुकसानीला सामोरे जावे लागत आहे.

राज्यात मागील चार-पाच वर्षांपासून सातत्याने काजू पिकात घट होत असून याचा फटका शेतकऱ्यांना मोठ्या प्रमाणात बसतच आहे. त्यासोबतच काजू पिकावर अवलंबून असलेल्या हुर्राक आणि फेणी उत्पादक व्यावसायिकांना देखील त्याचा फटका बसत आहे.

फेणी तसेच हुर्राकासाठी आवश्‍यक असलेले बोंडू मिळणे कठीण होत आहे. दिवसेंदिवस खर्च वाढत आहेत आणि त्याचा परिणाम स्वरूप आज जेवढी काजूला मागणी आहे, त्याहीपेक्षा पुरवठा कमी होत असून त्याचा फटका व्यावसायिकांना बसत आहे.

बोंडूची गुणवत्ता खालावली

पूर्वी ज्या स्थानिक काजूचे बोंडू असायचे ते आकाराने जरी काही प्रमाणात छोटे होते, तरी त्यात रस अधिक असायचा. आता अनेक बोंडू दिसायला भले मोठे दिसतात परंतु रसाच्या दृष्टीने कमी असतात. त्यात काजू उत्पादन कमी झाल्याने बोंडू मिळविण्यासाठी भटका लागते. त्यामुळे वाहतूक खर्च वाढतो. परिणामस्वरूप दरात वाढ करावी लागते, असे फेणी उत्पादकांचे म्हणणे आहे.