Car Accident on Cortalim-Sancoale Highway Goa: कुठ्ठाळी सांकवाळ महामार्गावर गुरूवारी 8 जून रोजी दुपारी पावणे तीनच्या सुमारास विचित्र अपघात झाला. एका भरधाव फॉर्च्युनर कारने येथे 3 वाहनांना ठोकरले. सुदैवाने या अपघातात कुणाचा मृत्यू झालेला नसला तरी तीन जण जखमी झाले आहेत.

यात पर्यटकांचा समावेश आहे. दरम्यान, फॉर्च्युनर कारसह ठोकरलेल्या चारही वाहनांचे मोठे नुकसान झाले आहे.

दुपारी पावणेतीनच्या सुमारास हा अपघात झाला. दाबोळी विमानतळाच्या दिशेने भरधाव वेगाने जाणाऱ्या एका फॉर्च्युनर कारने सांकवाळ येथे ओव्हरटेक करण्याच्या नादात चार वाहनांना ठोकरले.

दरम्यान, अपघातातील फॉर्च्युनर ही रेंट अ कार मधील वाहन आहे. भाड्याने ती कार संबंधित वाहनचालकाने घेतली होती. इतर वाहनांना वेगाने ओव्हरटेक करत चालक दाबोळी विमानतळाकडे जात होता. यावेळी वास्कोहून कुठ्ठाळीच्या दिशेने येत असलेल्या

वॅगन आर (जीए 06 टी 5062) कारला फॉर्च्युनरची धडक बसली. त्यामुळे वॅगन आर कार पलटली. या कारमधील तिघेजण जखमी झाले आहेत. फॉर्च्युनर कारने पुढे जाऊन आणखी दोन वाहनांना धडक दिली.

वॅगन आर कारमध्ये पर्यटक होते. ते दाबोळी विमानतळावरून मोपा विमानतळाकडे चालले होते. या अपघातात दोन पर्यटक व कारचालक गंभीर जय्वमी झाले. त्यांना 108 रूग्णवाहिकेतून बांबोळीतील गोमॅकोमध्ये दाखल केले गेले.

तसेच त्या मार्गावर विरुद्ध दिशेने असलेल्या रिलायन्स मोबाईल टॉवरला जाऊन फॉर्च्युनर कार धडकली. यात टॉवरचेही नुकसान झाले आहे. इतर वाहनधारकांनी फॉर्च्युनरच्या ड्रायव्हरला अडवून वेर्णा पोलिसांच्या ताब्यात दिले.

वेर्णा पोलिसांनी घटनास्थळी धाव घेत त्याला ताब्यात घेतले आणि पंचनामा केला आहे.