Canacona: काणकोण पालिका भवनाचे काम निकृष्ट दर्जाचे होत आहे ते पाडून पुन्हा बांधण्याची मागणी काल ‘व्हीजन ॲण्ड मिशन’ या बॅनरखाली घेतेल्या पत्रकार परिषदेत करण्यात आली. यावेळी नगरसेवक धीरज नाईक गावकर, श्‍यामसुंदर देसाई, जनार्दन भंडारी उपस्थित होते.

11 कोटी रुपये खर्चून सुडातर्फे पालिका भवन उभारण्याचे काम करण्यात येत आहे. मात्र, या कामावर देखरेख ठेवण्यासाठी सुडाचा जबाबदार कर्मचारी बांधकाम स्थळी उपलब्ध असत नाही. त्यामुळे कंत्राटदार मनमानी करत आहे.

खडीची भुकटी बांधकामात वापरण्यात येत आहे. बांधकामाचा पाया मजबूत नाही. कॉलम कलंडलेले आहेत. हल्लीच सभापती रमेश तवडकर यांच्यासह नगराध्यक्ष रमाकांत नाईक गावकर व नगरसेवकांनी बांधकामाची पाहणी केली होती. त्यावेळी सभापतींनीही बांधकामाविषयी नाराजी व्यक्त केल्याचे नगरसेवक धीरज नाईक गावकर यांनी सांगितले.

दुमाणे येथील कचरा प्रक्रिया प्रकल्पाचे काम पूर्ण झाले आहे. दोन हप्त्यात कंत्राटदाराला बिले दिली आहेत. आता फक्त अंतिम बिलाची फेड पालिकेने करायची आहे असे नगराध्यक्ष रमाकांत नाईक यांनी सांगितले.