Calangute Drug Case : गोव्यात वाढत्या शहरीकरणाबरोबरच गुन्हेगारीच्या घटनाही दिवसेंदिवस वाढू लागल्या आहेत. परबोवाडा येथे कळंगुट पोलिसांनी अंमली पदार्थांवर छापा टाकल्याचे वृत्त समोर आले असून यात नायजेरीयन नागरिकास अटक करण्यात आली आहे.

याबाबत अधिक माहिती अशी की, परबोवाडा कळंगुट येथील पालमारिन्हा रिसॉर्टजवळ एका ग्राहकाला अंमली पदार्थांची विक्री करण्यासाठी एक संशयित दुचाकी घेवून येणार असल्याची माहिती कळंगुट पोलिसांना विश्वसनीय सुत्रांकडून मिळाली होती.

या माहितीच्या आधारे पोलिसांनी सापळा रचला. संशयित त्या रिसॉर्टजवळ आला असता पोलिसांनी छापा टाकत संशयिताची व त्याच्या दुचाकीची तपासणी केली. यावेळी त्याच्याकडे 04 ग्रॅम कोकेन हा अमली पदार्थ व 2 ग्रॅम सायकोट्रॉपिक पदार्थ एक्टसी आढळून आला.

या कारवाईत कळंगुट पोलिसांनी संशयित अकोमोलाफे ओलायंका ओलुसोला, वय 23 वर्षे या नायजेरियन नागरिकाला अटक केली. तसेच त्याच्याकडील 70 हजारांचे अंमली पदार्थ व दुचाकी जप्त केली.

त्याच्यावर एनडीपीएस ॲक्ट अंतर्गत गुन्हा दाखल करण्यात आला आहे. संशयिताला चार दिवसांची पोलिस कोठडी सुनावण्यात आली आहे. याप्रकरणी कळंगुट पोलिस अधिक तपास करत आहेत.