पणजी: मुख्यमंत्री डॉ. प्रमोद सावंत आणि राज्याचे आरोग्यमंत्री विश्वजीत राणे हे सध्या दिल्लीत आहेत. त्यांच्या या दौऱ्यामुळे राज्यात राजकीय चर्चाना पुन्हा ऊत आला आहे. मंत्रिमंडळात फेरबदल होण्याची शक्यता असल्याने कोणाला डच्चू मिळणार आणि कोणाला लॉटरी लागणार, याबाबतच्या चर्चा ऐकू येत आहेत.

विशेष म्हणजे, गोविंद गावडे यांना मंत्रिमंडळातून वगळल्याने त्यांच्या जागी कोणाची वर्णी लागणार याबाबत सध्या मोठी उत्सुकता निर्माण झाली आहे. गावडे हे काही काळापासून वादग्रस्त विधानांबाबत चर्चेत होते. त्यांच्या जागी नव्या चेहऱ्याला संधी दिली जाईल, अशी शक्यता आहे.

राजनाथ सिंह यांचीही घेतली भेट

मुख्यमंत्री डॉ. प्रमोद सावंत यांनी दिल्लीत असताना संरक्षण मंत्री राजनाथ सिंह यांची देखील भेट घेतली. पणजीतील सैनिकी आणि दंत रुग्णालयाचे स्थलांतर, राज्यात एक सैनिकी शाळा सुरु करण्याचा प्रस्ताव आणि गोव्यात हेमरु युनिट सुरु करण्याबाबत संरक्षण मंत्री राजनाथ यांच्याशी चर्चा झाल्याची माहिती मुख्यमंत्री सावंत यांनी दिली.

डॉ. प्रमोद सावंत यांचा दिल्ली दौरा केवळ प्रशासकीय नसून भाजपच्या वरिष्ठ नेतृत्वाशी चर्चा करण्यासाठीही तो असल्याचे बोलले जात आहे. यामध्ये मंत्रिमंडळ फेरबदल, आगामी स्थानिक निवडणुकांची तयारी आणि कार्यकर्त्यांच्या नाराजीवर तोडगा काढण्याचे मुद्दे चर्चेचे केंद्रबिंदू असण्याची शक्यता आहे.