पणजी: पणजीतील सांतिनेज खाडी आणि दक्षिण गोव्यातील साळ नदीच्या शुद्धीकरणासाठी केंद्रीय जलशक्ती मंत्रालयाकडून निधी उपलब्ध करून दिला जाणार असल्याची माहिती मुख्यमंत्री डॉ. प्रमोद सावंत यांनी दिली. दिल्ली दौऱ्यानंतर मंगळवारी गोव्यात परतल्यानंतर त्यांनी पत्रकारांशी संवाद साधला.

मुख्यमंत्री म्हणाले की, दिल्लीतील बैठकीदरम्यान केंद्रीय जलशक्ती मंत्री सी. आर. पाटील यांच्याशी राज्यातील विविध जलस्रोतांचे संवर्धन आणि प्रदूषणमुक्तीबाबत सविस्तर चर्चा झाली. त्यावेळी पणजीतील सांतिनेज खाडी आणि दक्षिण गोव्यातील साळ नदीच्या शुद्धीकरणासाठी आवश्यक निधी देण्याबाबत सकारात्मक प्रतिसाद मिळाला. या दोन्ही जलस्रोतांमधील वाढते प्रदूषण, सांडपाण्याचा प्रश्न आणि पर्यावरणीय ऱ्हास याबाबत राज्य सरकारने केंद्राकडे पाठपुरावा केला होता. दरम्यान, दिल्ली दौऱ्यात राज्याशी संबंधित विविध विकासकामे, पायाभूत सुविधा, पर्यावरण संवर्धन आणि सामाजिक न्यायाशी निगडित विषयांवर केंद्रीय मंत्र्यांशी चर्चा झाल्याचे मुख्यमंत्री म्हणाले.

राजकीय आरक्षणाबाबत सकारात्मक घडामोडी

यावेळी मुख्यमंत्री डॉ. सावंत यांनी अनुसूचित जमाती (एसटी) समाजाच्या राजकीय आरक्षणाच्या मुद्द्यावरही भाष्य केले. या संदर्भातील चर्चा पुढे सरकत असून विविध मागण्यांचा गांभीर्याने विचार सुरू असल्याचे त्यांनी सांगितले. संबंधित घटकांशी संवाद साधण्याबरोबरच आवश्यक प्रक्रियांना गती देण्याचे काम सुरू असल्याचेही त्यांनी नमूद केले.

मंत्रिमंडळातील रिक्त पद लवकरच भरणार

राज्यातील राजकीय वर्तुळात चर्चेचा विषय ठरलेल्या मंत्रिमंडळातील रिक्त जागेबाबतही मुख्यमंत्र्यांनी संकेत दिले. गोवा (Goa) मंत्रिमंडळातील रिक्त मंत्रीपद लवकरच भरले जाईल, असे सांगत त्यांनी मंत्रिमंडळ विस्ताराच्या हालचालींना दुजोरा दिला. मात्र, संभाव्य नावांबाबत किंवा विस्ताराच्या कालमर्यादेबाबत त्यांनी कोणतीही ठोस माहिती दिली नाही.