डिचोली: श्रावण महिना संपून पाच दिवसांची चतुर्थी साजरी झाल्यानंतर ब्रॉयलर अंडी आता महाग झाली आहेत. एकाबाजूने मासळी मोठ्या प्रमाणात उपलब्ध होत असताना, दुसऱ्याबाजूने बॉयलर अंड्यांचा भाव मात्र वाढू लागला आहे.

श्रावण महिन्यानंतर अंड्यांच्या घाऊक दरात वाढ होताना शंभर अंड्यांमागे किमान १०० रुपयांनी वाढ झाली आहे. पुढील काही दिवस अंड्यांचे दर चढेच राहण्याची शक्यता आहे. दुसऱ्या बाजूने गावठी अंडीही महाग झाली आहेत. मासेमारी बंदीनंतर गेल्या श्रावण महिन्याच्या तोंडावर अंड्यांचे भाव काहीसे वाढले होते. मात्र श्रावण महिन्यात ६० ते ७० रुपये डझन असे अंड्यांचे दर होते.

मासळीची आवक वाढल्यानंतर अंड्यांचे दर कमी होणार, असा अंदाज होता. मात्र अंड्यांचे दर उतरण्याऐवजी ते वाढले आहेत. मासळी पाठोपाठ अंडी महाग होत असल्याने सामान्य खवय्यांना जिभेला लगाम घालावा लागणार आहे.

डिचोली बाजारात बॉयलर अंडी उपलब्ध होत आहेत, त्यात कर्नाटक राज्यातून अंड्यांची अधिक आयात होत असते. बॉयलर अंड्यांच्या दरात हळूहळू वाढ होत आहे. अंड्यांच्या घाऊक दरात वाढ होताना शंभर नगामागे ६०० रुपये, असे अंड्यांचे दर झाले आहेत. ७० रुपयांवरून आता ८० रुपये डझन याप्रमाणे अंड्यांची विक्री होत आहे. बाजारात क्वचितच गावठी अंडी विक्रीस उपलब्ध होत असून, ती २५० रुपये डझन याप्रमाणे विकण्यात येत आहेत.