नगरगाव: गोव्यात सध्या चोरीचं प्रमाण वाढत आहे. मंगळवार (दि. २७) रोजी सत्तरी तालुक्यातील ब्रह्माकरमळी या गावातली सुप्रसिद्ध श्री ब्रम्हदेव देवस्थानाची फंड पेटी फोडण्याचा प्रकार घडला. ब्रह्माकरमळी येथील हे देवस्थान गोव्यातील ब्रह्मदेवाचं एकमेव मंदिर आहे. स्थानिक आणि मंदिरातीच्या कमिटीने चोरट्याला ४८ तासांच्या आत पकडण्याची मागणी केली आहे.

वाळपईतील ॲड. शिवाजी देसाई यांनी दिलेल्या माहितीनुसार, मंगळवारी मध्यरात्री ही घटना घडली असल्याची शक्यता आहे. एका अज्ञात चोराने मंदिरात घुसून फंडपेटी चोरली, तसेच मंदिराच्या गर्भगृहात देखील शिरण्याचा प्रयत्न केला. शिवाजी देसाई हे स्थानिक आहेत आणि त्यांच्यामते ब्रह्माकरमळी येथे घडलेला हा प्रकार अत्यंत दुर्दैवी म्हणावा लागेल.

पोलिसांनी ४८ तासांच्या आत या चोरला पकडावं अशी मागणी त्यांनी केली आहे. त्यांच्यामते पूर्ण नियोजन करून ही चोरी करण्यात आलीये आणि या चोराला पकडण्यासाठी लागणारी सगळी मदत स्थानिक आणि मंदिराची समिती करेल असे आश्वासन त्यांनी दिले आहे.

वामनराव देसाई हे मंदिराच्या समितीचे उपाध्यक्ष आहेत. त्यांनी माध्यमांना दिलेल्या माहितीनुसार सकाळी ६:१५ च्या सुमारास मंदिर साफ करण्यासाठी येणाऱ्या सफाई कर्मचाऱ्याने त्यांना चोरी झाल्याची माहिती दिली. ही घटना समजताच ते तात्काळ मंदिरात दाखल झाले आणि पोलीस यंत्रणांना याबद्दल माहिती दिली.

देसाई यांच्या म्हणण्यानुसार हे मंदिर संपूर्ण भारतातील ब्रह्मदेवाचे एकमेव जागृत मंदिर आहे. पोलिसांनी या घटनेची गांभीर्याने दाखल घेऊन चोराला ४८ तासांत ताब्यात घ्यावं अशी मागणी त्यांनी केली.

पोलिसांनी आवश्यक असलेली सर्व मदत पुरवली जाईल,मात्र चोरट्याला ४८ तासांच्या अवधीत अटक करावी असं मंदिराचे सचिव महेंद्र गाडगीळ म्हणाले आहेत.