Goa Board Exam Paper Revaluation Fee

पणजी: यंदापासून दहावी आणि बारावीच्या शालान्त परीक्षेत एखाद्या विद्यार्थ्याला निकालानंतर आपल्या उत्तरपत्रिकेची फेरतपासणी करायची असल्यास आता प्रत्येक प्रश्नासाठी १०० रुपये शुल्क अदा करावे लागणार असल्याचे गोवा माध्यमिक आणि उच्च माध्यमिक मंडळाचे अध्यक्ष भगीरथ शेट्ये यांनी सांगितले.

शेट्ये म्हणाले की, पूर्वी एखाद्या विद्यार्थ्याला वाटले की, आपल्याला कमी गुण मिळाले आहेत. त्यावेळी प्रतिपेपर ७०० रुपये शुल्क भरून पुन्हा पूर्ण उत्तरपत्रिका तपासली जायची.

..तर परतावा मिळणार

प्रत्येक प्रश्नपत्रिकेत सर्वसामान्यपणे १५ ते २० एका गुणाचे प्रश्न असतात. या एका गुणाचे उत्तर बरोबर असताना जर गुण दिले नसतील तर फेरतपासणीनंतर त्या विद्यार्थ्याला शुल्काचा परतावा मिळेल. फेरतपासणी प्रक्रिया सुटसुटीत करण्यासाठी अशा प्रकारचा निर्णय घेण्यात आल्याचे शेट्ये यांनी सांगितले.

फोटो कॉपीसाठी पाचशे रुपये

गोवा शालान्त मंडळाच्या नव्या प्रक्रियेनुसार, जर एखाद्या विद्यार्थ्याला उत्तरपत्रिकेची फेरतपासणी करायची असेल तर पहिल्यांदा आपल्या शाळेच्या पोर्टलच्या माध्यमातून ५०० रुपये भरावे लागतील. नंतर त्यांना शाळेच्या ईमेलवर उत्तरप्रतिकेची फोटोकॉपी प्रत पाठविण्यात येईल. ही पत्रिका पाहून त्यांना ज्या प्रश्नांबाबत समस्या आहे, ते दोन दिवसांत कळवावे लागेल. जितक्या प्रश्नांबाबत समस्या असेल, तेवढ्या प्रश्नांचे प्रतिप्रश्न १०० रुपये याप्रमाणे शुल्क भरावे लागेल. जेणेकरून संबंधित प्रश्नांच्या उत्तराची फेरतपासणी होईल. ही पूर्ण प्रक्रिया ऑनलाईन पद्धतीने केली जाणार असल्याचे शेट्ये यांनी सांगितले.