पणजी: सामाजिक कार्यकर्ते स्वप्नेश शेर्लेकरांना भाजप नेत्याने फोनवरुन धमकी दिल्याचे धक्कादायक प्रकरण समोर आले आहे. रामा काणकोणकर यांना झालेल्या जीवघेण्या मारहाणीच्या घटनेनंतर शेर्लेकरांना मिळालेल्या धमकीमुळे चिंता व्यक्त केली जात आहे. आम्ही देशप्रेमी म्हणत भाजप नेता महानंद अस्नोडकर शेर्लेकरांनी धमकी देत आहे. या फोनचा ऑडिओ आता समोर आला आहे.

“आम्ही देशप्रेमी, तू देशद्रोहीसारखे काम करु नको. पक्षाचे कार्यकर्ते आणि देशप्रेमींवर बोलशील तर विषय भरकटेल. सगळ्यांना एकाच माळेत गोवत असाल तर तू चुकीचे करतोयेस. व्हिडिओत तू काय बोलला ते तपासून पाहा. पक्षाच्या कार्यकर्त्यांवर बोलू नको, आम्ही देश प्रेम करणारे लोक आम्हाला पक्ष लागत नाही”, असे महानंद अस्नोडकर फोन कॉलवर बोलत आहे.

“तुला बोलायचं तर, मंत्र्यांवर बोल, मुख्यमंत्र्यांवर बोल त्याच्याशी काय नाही. मी रोहन खंवटे किंवा मुख्यमंत्र्याचे समर्थन करतो असे काहीच नाही. तुझ्यात हिंमत असेल तर माझ्या समोर ये नाहीतर, मला बोलव मी येतो तिथे”, असे आव्हान देत आहे.

Listen Audio Here

(गोमंतक या ऑडिओ क्लिपची पुष्टी करत नाही.)

तू मूर्ख आहेस, देवाने तुला कमी अक्कल दिली, असेही महानंद अस्नोडकर या फोन कॉलवर बोलताना दिसत आहे. यावेळी महानंद खाप्रेश्वर देवस्थानाबाबत देखील बोलत आहे.

शेर्लेकर यावेळी महानंदला पक्षाच्या बैठकीत बोलण्यासाठी सांगत आहेत, तसेच, सरकार देखील तुमचेच असल्याचे सांगत आहेत. दरम्यान, याप्रकरणी पत्रकार परिषद घे, असे महानंद सांगत आहे.

काणकोणकर यांच्यावर झालेल्या जीवघेणा हल्ला प्रकरण ताजे असताना समोर आलेला धमकीचे प्रकरण चिंताजनक असल्याची प्रतिक्रिया राजकीय नेत्यांनी दिली आहे. विजय सरदेसाई, अमित पाटकर आणि युरी आलेमाव यांनी या धमकीचा निषेध केला आहे. दरम्यान, सामाजिक कार्यकर्ते स्वप्नेश शेर्लेकरांनी याप्रकरणी पर्वरी पोलिस स्थानकात तक्रार दाखल केली आहे.