Bicholim News डिचोली शहरात गर्दीच्या ठिकाणी उभे राहून रहदारीस अडथळा निर्माण करणाऱ्या ‘पोदेरां’वर आता कारवाई होणार आहे. डिचोली पालिकेकडून तसे स्पष्ट संकेत मिळाले आहेत. शहरात सध्या ‘पदेरां’ची संख्या वाढली आहे.

सायकल किंवा मोटारसायकलवरून हे ‘पोदेर’ रोज सकाळ-संध्याकाळ बाजार परिसर मिळून शहरातील विविध ठिकाणी पाव विक्री करताना आढळून येतात. आश्चर्याची बाब म्हणजे पाव विक्री करणारे सर्व ‘पदेर’ राज्याबाहेरील आहेत.

शहरात पदेरांची संख्या वाढत असली आणि विविध ठिकाणी पोदेर आपला व्यवसाय करीत असले, तरी शहरातील न्यायालय इमारत आणि बाजारात जाणाऱ्या महत्त्वाच्या रस्त्यांवर उभे राहून पाव विक्री करणाऱ्या पदेरांमुळे वाहतुकीला मोठा अडथळा होत असतो.

बहुतेकजण तर मध्येच वाहने उभी करून पाव खरेदी करताना दिसून येतात. त्यामुळे रहदारीस अडथळा निर्माण होतानाच, अपघातही घडण्याची शक्यता नाकारता येत नाही.

शहरात पाव विक्री करणारे काही ‘पोदेर’ रहदारीस अडथळा निर्माण करतात. त्यामुळे एखादेवेळी अपघातासारखा अनर्थ घडण्याची शक्यता नाकारता येत नाही. याबाबतीत पालिका गंभीर आहे.

अडथळा निर्माण करणाऱ्या ‘पोदेरां’विरोधात कारवाई करण्यात येणार आहे. तसे निर्देशही मार्केट निरीक्षकांना देण्यात आले आहेत. ‘पोदेरां’नाही त्याची कल्पना देण्यात आली आहे. - कुंदन फळारी, नगराध्यक्ष