Goa: डिचोलीत सर्वत्र दिवाळी सणाचा उत्साह पसरला असून, दिवाळीच्या पूर्वदिनी आज बुधवारी डिचोलीचा बाजार (Bicholim market) दिवाळीच्या (Diwali) साहित्याने फुलून गेला होता. त्यातच बुधवार हा डिचोलीच्या आठवडी बाजाराचा दिवस असल्याने बाजारात ग्राहकांची वर्दळ वाढली होती. सायंकाळी तर प्रचंड गर्दी उसळताना सामाजिक नियमांचाही फज्जा उडाला होता. एकाबाजूने बाजार फुलून गेला असला, तरी बाजारात महागाईची झळ दिसून येत होती. दुसऱ्याबाजूने यंदा मात्र पोह्यांच्या विक्रीत बरीच घट झाल्याचा अंदाज आहे.

दिवाळी साहित्य खरेदी

डिचोलीचा बाजार गेल्या दोन दिवसांपासूनच दिवाळीच्या साहित्याने फुलून गेला आहे. आज सकाळी बाजारात ग्राहकांची संख्या कमी होती. अकरानंतर मात्र बाजारात ग्राहकांची वर्दळ हळूहळू वाढू लागली होती. सायंकाळी तर बाजारात ग्राहकांची प्रचंड गर्दी उसळली होती. सामाजिक नियमांचेही तीनतेरा उडाले होते. सायंकाळी उशिरापर्यंत रेडिमेड आकाशकंदिल, पणत्या, कारीटे आदी दिवाळीसाठी लागणाऱ्या साहित्याची खरेदी सुरु होती. मिठाई आणि रेडिमेड कपडयांच्या दुकातूनही ग्राहकांची वर्दळ दिसून येत होती. महागाईच्या वणव्यामुळे मात्र यंदा दिवाळी साहित्याच्या खरेदीवर काहीसा परिणाम झाल्याचा सूर दुकानदारांकडून कानी पडत होता.

पोह्यांना मागणी घटली

दिवाळी म्हणजे पोहे आलेच. किराणा दुकानांसह बाजारात गावठी पोहे विक्रीस उपलब्ध झाले आहेत. यंदा मात्र पोहे खरेदीवर परिणाम झाल्याची माहिती विक्रेत्यांकडून मिळाली आहे. डिचोलीत काही राजकीय पक्ष आणि नेत्यांनी दिवाळीची भेट म्हणून आपल्या घरोघरी पोहे वाटप केले आहेत. त्यामुळेच दरवर्षीप्रमाणे यंदा पोह्यांची खरेदी झालेली नाही. असे बाजारातील एका विक्रेत्यांने सांगितले.

फळांना मागणी

दीपावलीच्या उत्साहात उद्याच लक्ष्मीपूजन होणार आहे. लक्ष्मीपूजन म्हटल्याबरोबर पूजनासाठी पंचफळे आवश्यक असतात. त्यामुळे बुधवारी बाजारात फळांना तेजी आली होती. फळे खरेदी जोरात सुरु होती. 80 ते 100 रुपयांपर्यंत पंचफळे विकण्यात येत होती. बुधवारी दिवसभरात फळ विक्रीतून दीड ते दोन लाखांची उलाढाल झाल्याचा अंदाज आहे.