Goa Medical College: गोवा वैद्यकीय महाविद्यालय रुग्णालयातील अवयव प्रक्रिया जीव वाचवणारी ठरत आहे. ब्रेन डेड रुग्णाने दान केलेल्या अवयवांचे प्रत्यारोपण केल्याने चार जणांचे प्राण वाचले असल्याची घटना या आधी एकदा घडली होती. तशीच एक घटना पुन्हा एकदा घडली असून यामुळे गोवा वैद्यकीय महाविद्यालयाचे नाव चांगलेच चर्चेत आहे.

‘ब्रेन डेड’ झालेल्या झारखंड येथील 40 वर्षीय व्यक्तीच्या नातेवाईकांनी अवयदानाला परवानगी दिल्याने दोन जणांचा मुत्रपिंड प्रत्यारोपण करणे शक्‍य झाले आहे.

उंचावरून पडल्याने ती व्यक्ती जबर जखमी झाली होती. तीला उपचारासाठी गोमेकॉत दाखल करण्यात आले होते. डॉ. सनथ भाटकर आणि डॉ. प्रथमेश यांनी त्या रुग्णाला ब्रेन डेड घोषित केले. यामुळे त्याचे अवयव इतरांना दान करणे शक्य झाले.

‘गोमेकॉ’त आजवर पाच वेळा अवयव प्रत्यारोपण करण्यात आले आहे. १९ जणांना त्याचा लाभ झाला आहे. ३ हृदये, ४ यकृते, २ फुफ्फुसे आदींही ‘गोमेकॉ’तून पुरवण्यात आली आहेत. सध्या ५१ जण मुत्रपिंड मिळवण्यासाठीच्या प्रतीक्षा यादीवर आहेत.

गोमेकॉतील सूत्रांनी दिलेल्या माहितीनुसार जखमी अवस्थेत झारखंड येथील इसमाला इस्पितळात आणण्यात आले होते. त्यामुळे केवळ मुत्रपिंडांचे प्रत्यारोपण करणे शक्य होते.

नातेवाईकांच्या परवानगीनंतर मुत्रपिंडांच्या प्रत्यारोपणासाठी दोन शस्त्रक्रिया करण्यात आल्या. त्या व्यक्तींमुळे दोन जणांना यापुढे डायलिसीसवर जगावे लागणार नाही.

मुत्रपिंडांचे प्रत्यारोपण दोन रुग्णांत करण्यात आले. त्यसाठी प्रतीक्षा यादीतून मुत्रपिंड स्वीकारू शकेल, अशा इच्छुकांची निवड करण्यात आली. त्यासाठी काही वैद्यकीय निकषांचा विचार करण्यात आला.