पणजी : मोन्सेरात कुटुंबाकडून ताळगावचा विध्वस्त सुरु असून ताळगावची शेती पुरवून तेथे इमारती उभ्या केल्यानंतर आता किनाऱ्यावरील झाडे तोडून व टेकड्या कापून बेकायदेशीर रस्ता (illegal road) केला जात आहे. या प्रकरणी आपण पोलिस तक्रार करणार असून गरज भासल्यास न्यायालयातही जाणार आहे.

अशी माहिती पणजी महापालिकेचे माजी महापौर व ज्येष्ठ नगरसेवक उदय मडकईकर यांनी दिली. करंझाळे येथील किनाऱ्यावर जाणाऱ्या वाटेजवळ टेकडी कापून व काही झाडे तोडून नवा रस्ता केला जात आहे. सीआरझेड किवा इतर कुठलेही परवाने न घेता बेकायदेशीरपणे सुट्टीच्या दिवसाची संधी साधून हा रस्ता एका हॉटेलच्या फायद्यासाठी केला जात आहे. मोन्सेरात कुटुंबियांतचा यात हात असून ताळगाव सरपंच व पणजीचे महापौर यात गुंतलेत असा दावा आज सदर जागी पत्रकारांना बोलावून उदय मडकईकर यांनी केला.

ताळगावच्या लोकांनी व पर्यावरण प्रेमींनी या बेकायदेशीर गोष्टींविरुध्द आता उठाव उठण्याची गरज असल्याचे मडकईकर यावेळी म्हणाले. आपण ग्रेटर पणजी पीडीएकडे या विषयावर तक्रार केली मात्र आमदार बाबूश मोन्सेरात हेच ग्रेटर पणजीचे अध्यक्ष असल्याने तेथे तक्रार करुनही फायदा झालेला नाही. करंझाळे येथे प्रभाग ४ व ५ मध्ये हा बेकायदेशीर रस्ता होत असून सर्व नियाम धाब्यावर बसवून बाबूश मोन्सेरात यांच्या सहकार्यानेच हे सर्व चालू असल्याचा आरोप ज्यो डायस यांनी यावेळी केला.