पणजी: येत्‍या २१ जुलैपासून सुरू होणाऱ्या गोवा राज्‍य विधानसभेच्‍या पावसाळी अधिवेशनाची रणनीती आखण्यासाठी विरोधी पक्षनेते युरी आलेमाव यांनी बोलावलेल्‍या बैठकीला आम आदमी पक्षाचे (आप) आमदार व्‍हेंझी व्‍हिएगस आणि क्रुझ सिल्‍वा यांनी उपस्‍थिती लावली. पण, गोवा फॉरवर्डचे आमदार विजय सरदेसाई आणि रिव्‍हॉल्‍युशनरी गोवन्‍सचे (आरजी) आमदार वीरेश बोरकर यांनी मात्र पाठ फिरवली.

विधानसभा अधिवेशनाची अधिसूचना जारी होताच प्रथेनुसार विरोधी पक्षनेते विरोधी आमदारांची बैठक घेऊन प्रश्‍न, खासगी ठराव याबाबत त्‍यांच्‍याशी चर्चा करून रणनीती आखली जाते. यावेळी मात्र विरोधी पक्षनेते युरी आलेमाव यांनी प्रश्‍न आणि खासगी ठराव सादर करण्‍याचा कालावधी संपल्‍यानंतर विरोधी आमदारांच्‍या बैठकीचे आयोजन केले.

त्‍यावरून आमदार विजय सरदेसाई यांनी त्‍यांच्‍यावर टीकास्त्र सोडले होते. सर्व प्रक्रिया पूर्ण झाल्‍यामुळे विरोधी पक्षनेत्‍यांनी बोलावलेल्‍या बैठकीला आता अर्थ राहत नसल्‍याचे त्‍यांनी म्‍हटले होते. तर, ‘आप’चे राज्‍य समन्‍वयक अमित पालेकर यांनीही याबाबत नाराजी व्‍यक्त केली होती.

‘आरजी’चे आमदार वीरेश बोरकर यांनी सुरवातीलाच आपण बैठकीला उपस्‍थित राहणार नसल्‍याचे सांगितले होते. दरम्‍यान, गोवा फॉरवर्ड आणि ‘आप’च्‍या नाराजीमुळे या दोन्‍ही पक्षांचे तीन आमदार बैठकीला उपस्‍थित राहणार की नाहीत, याकडे राजकीय वर्तुळाचे लक्ष लागून राहिले होते.

सत्ताधाऱ्यांना उघडे पाडणे हाच अजेंडा

बैठकीनंतर पत्रकारांशी बोलताना विरोधी पक्षनेते युरी आलेमाव यांनी सांगितले की, येत्‍या अधिवेशनात सत्ताधाऱ्यांना विविध प्रश्‍नांवरून उघडे पाडणे हाच आमचा प्रमुख अजेंडा असेल. विजय सरदेसाई आणि वीरेश बोरकर यांना बैठकीचे निमंत्रण दिले होते. पण ते आले नाहीत. त्‍यावर आपल्‍याला काहीही बोलायचे नाही.