Goa Assembly Monsoon Session 2023 : राज्यात रस्ता अपघाताचे प्रमाण दिवसेंदिवस वाढत असताना त्यामध्ये दुचाकीस्वारांचे प्रमाण सर्वाधिक आहे. गेल्या साडेचार वर्षांत रस्ता अपघातात ५८६ दुचाकीस्वारांचा मृत्यू झाला आहे.
सरासरी दिडशेच्या आसपास दरवर्षी दुचाकीस्वारांचा बळी जात आहे. हेल्मेट वापरल्याने अनेकांचा जीव बचावला आहे तर हेल्मेट न वापरल्याने भीषण अपघातात दुचाकीस्वारांचा मृत्यू झाल्याच्या घटना घडल्या आहेत.
राज्यात २०१९ पासून ते आतापर्यंत किती अपघात झाले आहेत. ज्यामध्ये दुचाकीचा समावेश आहे, असा प्रश्‍न आमदार चंद्रकांत शेट्ये यांनी विधानसभेत विचारला होता त्यावर वाहतूकमंत्री माविन गुदिन्हो यांनी उत्तर देताना ५८६ जणांचा मृत्यू झाल्याचे नमूद केले आहे.
२०१९-२० या वर्षात १५७ जण, २०२०-२१ या वर्षात १२०, २०२१-२२ या साली १३०, २०२२-२३ या वर्षात १५१ तर मार्च २३ ते आतापर्यंत २८ जणांना मृत्यूला सामोरे जावे लागले आहे, अशी माहिती दिली आहे.
राज्यातील अपघातांची आकडेवारी...
दक्षिण गोव्यात २०१९-२० या आर्थिक वर्षात १,१२५ दुचाकीचे अपघात झाले, त्यापैकी ३२१ जणांनी वापरले नव्हते. या अपघातात ८३ दुचाकीचालक तर १४ सहचालक ठार झाले.
उत्तर गोव्यात ८३१ दुचाकींचे अपघात झाले, त्यामध्ये ७२ जणांनी घातले नव्हते. त्यामध्ये ७४ दुचाकीचालक तर १३ सहचालकांचा बळी गेला आहे.
२०२०-२१ मध्ये दक्षिण गोव्यात ८९९ दुचाकी अपघात झाले, त्यामध्ये ७९० जणांनी हेल्मेट वापरले होते तर १७९ जणांनी नव्हते. त्यामुळे या झालेल्या अपघातात ७६ चालक व १४ सहचालकांचा मृत्यू झाला होता.
उत्तर गोव्यात ५६२ दुचाकी अपघातातील ५३७ जणांनी हेल्मेट घातले होते तर २५ जणांनी नव्हते. त्यामध्ये ४४ चालकांचा तर ७ सहचालकांचा मृत्यू झाला होता.
२०२१-२२ या आर्थिक वर्षात दक्षिण गोव्यात ९५६ दुचाकी अपघात झाले होते, त्यामध्ये १९३ जणांनी हेल्मेट घातले नव्हते.
या अपघातात ७८ चालक व १९ जणांचा मृत्यू झाला होता. उत्तर गोव्यात ७०३ दुचाकीचे अपघात झाले त्यावेळी ४१ जणांनी वापरले नव्हते. त्यावेळी ५२ चालकांचा तर ९ सहचालकांचा बळी गेला.
२०२२-२३ या आर्थिक वर्षात दक्षिण गोव्यात १,१९४ दुचाकी अपघात झाले, त्यामध्ये १,०४४ चालकांनी हेल्मेट घातले होते तर १८५ जणांनी वापरले नव्हते.
त्यामुळे ९२ चालकांचा तर २२ सहचालकांचा मृत्यू झाला. उत्तर गोव्यात ९०४ दुचाकींचे अपघात झाले त्यातील ८५८ चालकांनी हेल्मेट वापरले होते तर ६१ जणांनी वापरले नव्हते. ८७ चालक व १० सहचालकांचा मृत्यू झाला होता.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.