गोवा विधानसभेचे सध्या पावसाळी अधिवेशन सुरु आहे. विरोधक आणि सत्ताधारी यांच्यात अनेक मुद्यांवरुन खडाजंगी पाहायला मिळत आहे. विरोधक राज्यातील अनेक मुद्यांवरुन सरकारला धारेवर धरत आहेत.

याचदरम्यान आमदार व्हेन्झी व्हिएगस यांनी विधानसभेत विचारेल्या लेखी प्रश्नाला सावंत सरकारमधील कृषीमंत्री रवी नाईक यांनी दिलेल्या उत्तरातून एक महत्वाची माहिती समोर आली. राज्यातील भात उत्पादनात 2022-23 च्या तुलनेत 2023-24 मध्ये 9462 मेट्रीक टनांनी वाढ झाली. परंतु सत्तरी तिसवाडी आणि धारबांदोड या तीन तालुक्यातील भात उत्पादनात घट नोंदवली.

कृषीमंत्री रवी नाईक यांनी आपल्या उत्तराच्या माध्यमातून संपूर्ण आकडेवारी सभागृहासमोर ठेवली. 2022-23 मध्ये उत्तर गोव्यात तब्बल 57712 मेट्रीक टन भाताचे उत्पादन झाले. तर दक्षिण गोव्यात 2022-23 मध्ये 74882 मेट्रीक टन भात उत्पादन झाले होते. हे उत्तर गोव्याच्या तुलनेत अधिक होते.

याशिवाय, 2023-24 मध्ये त्यात 7063 मेट्रिक टनांनी वाढ होऊन 81945 मेट्रीक टन झाल्याचे मंत्री महोदयांनी सभागृहासमोर सादर केलेल्या आकडेवारीतून स्पष्ट झाले.