पणजी: गोव्यातील एका नव्या उद्योगाची 8.43 कोटी रुपयांची गुंतवणूक मिळवण्याची संधी हुकली. गोवा पर्यटनाची माहिती देणाऱ्या Goa App च्या संस्थापकांना अमेरिकेतील एका टीव्ही शोमध्ये हजेरी लावण्याची संधी मिळाली. उद्योगाच्या संस्थापकांनी प्रसिद्ध गुंतवणुकदार टीम ड्रेपर यांच्यासमोर उद्योग समजावून सांगितला खरा पण, त्यांना फायनलपर्यंत मजल मारता आली नाही.

Goa App या गोव्यातील पर्यटनाची माहिती देणाऱ्या App ची निर्मिती साखळीच्या राधाप्रसाद बोरकर (३२) आणि निळकंठ शेट शिरोडकर (३२. रा. साखळी) यांनी केली आहे. अलिकडेच दोघांनी "मीट द ड्रेपर" या टीम ड्रेपर यांच्या अमेरिकन शोमध्ये हजेरी लावली. बोरकर आणि शिरोडकर यांनी Goa App ची संकल्पना, उत्पन्न आणि इतर बाबींची माहिती शोमध्ये दिली. पण, त्यांना गुंतवणूक मिळवण्याच्या शर्यतीत टीकता आले नाही.

शार्क टँकच्या धर्तीवरच मीट द ड्रेपर नावाचा शो अमेरिकत सुरु आहे. यात प्रसिद्ध गुंतवणूकदार टीम ड्रेपर विविध उद्योगात गुंतवणूक करतात. यापूर्वी ड्रेपर यांनी कॉईनबेस, बैदू, हॉटमेल, स्काईप, टेस्ला, स्पेस एक्स आणि ट्वीटर यासारख्या कंपनीत गुंवतणूक केली आहे. उद्योगांना या कार्यक्रमात एक मिलियन डॉलर (8,43,92,900 भारतीय रुपये) पर्यंत गुंतवणूक मिळवण्याची संधी असते.

गुंतवणुकीसाठी आम्ही गोवा सरकारकडे पीच केलं होतं पण आंतरराष्ट्रीय स्तरावर अशाप्रकारे कधीच पीच केलं नव्हतं. मोठ्या गुंतवणुकीसाठी हा आमचा पहिलाच प्रयत्न होता. आमचं सिलेक्शन झाले नाही पण, जागतिक पातळीवर App चे प्रमोशन आमचे ध्येय होतं. लोकांना माहिती व्हायला हवं की असं App उपलब्ध आहे, असे संस्थापक राधाप्रसाद बोरकर म्हणाले.

याशिवाय याच शोमध्ये समारो (Samaaro) या फातोर्डातील कंपनीने देखील गुंतवणुकीसाठी शोमध्ये पीच सादर केले. दरम्यान, त्यांच देखील अंतिम फेरीसाठी निवड झाली नाही. शोमधील ड्रेपर यांच्याशी झालेला संवाद प्रेरणादायी होता, असे मत पूर्णांक प्रकाश यांनी नोंदवले. समारो इव्हेंट मॅनेजमेंटमध्ये एआयचा वापर यावर आधारीत कंपनी आहे.