पेडणे: मांद्रे आणि कोरगाव गावांच्या हद्दीवरील सुमारे २० एकर क्षेत्रातील भातशेती यंदा नेहमीपेक्षा तब्बल दीड महिना लवकर कापणीसाठी तयार झाली आहे. मात्र, शासनाच्या अनुदानातून उपलब्ध होणाऱ्या हार्वेस्टिंग मशिनचे तालुकास्तरीय नियोजन अद्याप झालेले नसल्याने शेतकऱ्यांसमोर पीक वेळेत कापण्याचे संकट उभे राहिले आहे.

गेल्या काही वर्षांपासून भात कापणी व मळणीसाठी शासनाच्या अनुदानातून हार्वेस्टिंग मशीन उपलब्ध करून दिली जातात. त्यामुळे कापणीसाठी लागणारा वेळ आणि मजुरीचा खर्च मोठ्या प्रमाणात कमी होतो. तालुक्यातील शेतकरी संस्था किंवा संबंधित संस्थांच्या माध्यमातून या यंत्रांचे नियोजन केले जाते. साधारणपणे भातशेती पिकण्याच्या कालावधीचा अंदाज घेऊन संबंधित संस्थांची बैठक घेतली जाते आणि गावनिहाय यंत्र उपलब्ध करून देण्याचे नियोजन केले जाते.

यंदा सावंतवाडा-मांद्रे आणि पेठेचावाडा-कोरगाव हद्दीवरील मळ्यातील भात नेहमीपेक्षा सुमारे दीड महिना लवकर कापणीसाठी तयार झाले आहे. तालुक्यातील अन्य भागांतील भात पीक अद्याप तयार झाले नसल्याने हार्वेस्टिंग मशीनचे नियोजन होण्यास आणखी वेळ लागण्याची शक्यता आहे. त्यामुळे हातातोंडाशी आलेला घास वाया जाण्‍याची भीती व्‍यक्त केली जात आहे.

मशीन उपलब्‍ध झाले नाही तर मजूर आणावे लागतील किंवा कुटुंबातील सदस्यांच्या मदतीने कापणी करावी लागेल. मात्र, सध्या शेतीच्या कामासाठी मजूर मिळणे आणि वाढलेली मजुरी परवडणे, ही देखील शेतकऱ्यांसमोरील मोठी समस्या ठरत आहे.

भातशेतीचा हंगाम सर्व भागांत एकाच वेळी येत नसल्याने लवकर पिकणाऱ्या भागांसाठी शासनाने स्वतंत्र किंवा तात्पुरती कापणी यंत्राची व्यवस्था करावी, अशी मागणी शेतकऱ्यांनी केली आहे.

सरकारने तातडीने व्‍यवस्‍था करावी

आमच्या भागातील भात पीक नेहमीपेक्षा खूप आधी तयार झाले आहे. हार्वेस्टिंग मशीनचे नियोजन होईपर्यंत वाट पाहिली तर पिकाचे नुकसान होण्याची भीती आहे. केवळ आमच्या शेतीसाठी मशीन आणणे प्रशासनासाठी अडचणीचे ठरू शकते. त्यामुळे शासनाने अपवादात्मक परिस्थितीचा विचार करून तातडीने व्यवस्था करावी, अशी मागणी शेतकऱ्यांनी केली.

...तर पुन्‍हा कोयतीने कापणी आणि पायाने मळणी

हार्वेस्टिंग मशीन उपलब्ध झाले नाही आणि कापणीला विलंब झाला तर पावसामुळे भात पीक आडवे पडून कोंब येण्याची शक्यता आहे. त्यामुळे पंधरा-वीस वर्षांपूर्वीप्रमाणे पुन्हा कोयतीने कापणी आणि पायाने मळणी करण्याची वेळ येऊ शकते. मजुरांची कमतरता आणि वाढलेली मजुरी, ही शेतकऱ्यांसाठी मोठी समस्या ठरणार आहे.