Goa Accident Case: राज्यात रस्ते अपघातांचे सत्र सुरूच असून दिवसागणिक अपघातांच्या संख्येत वाढ होत आहे. शुक्रवारी सकाळी मालपे पेडणे येथील महामार्गावरील उतरणीवर महाराष्ट्र पासिंगच्या एका कारचा (MH23 AS 7909) अपघात झाल्याचे वृत्त अमोर आले आहे.

हा अपघात गुरुवारी रात्री घडल्याची माहिती स्थानिकांकडून प्राप्त झाली आहे. या अपघातात एकूण चारजण जखमी झाले असून चौघांनाही बांबोळी येथे उपचारासाठी नेले असल्याची माहिती प्राप्त झाली आहे.

तसेच म्हापसा लगतच्या थिवि येथे भाजीपाला वाहतूक करणाऱ्या पिकअप ट्रक चालकाचे गाडीवरील नियंत्रण सुटल्याने पिकअप रस्ता सोडून शेजारच्या शेतात घुसली. सुदैवाने पिकअप चालक थोडक्यात बचावला आहे.

या घटनेत वाहनाचे नुकसान झाले असून गाडीमधील भाजीपाल्याच्या गोण्या सर्वत्र पसरल्या होत्या. या दोन्ही घटनांची पोलीस दफ्तरी नोंद झाली आहे का यासंबंधी माहिती मिळू शकली नाही.

वाहतूक पोलिसांनी भरधाव वेगावर नियंत्रण मिळवण्यासाठी रहदारीच्या ठिकाणी cctv कॅमेरा बसवले आहेत. मात्र तरीही वाहतुकीचे नियम न पाळल्यामुळे अपघात होत असल्याचे दिसून येतेय.