पणजी: गोव्यात येत्या तीन वर्षांत विविध शासकीय विभागांमध्ये एकूण ८ हजार पदे रिक्त होण्याची शक्यता असून, सरकारी नोकरीच्या प्रतीक्षेत असलेल्या तरुणांसाठी ही मोठी संधी ठरणार आहे. अनेक विभागांतील कर्मचाऱ्यांच्या निवृत्तीचा टप्पा जवळ आला असून, रिक्त पदांची भरती प्रक्रिया टप्प्या-टप्प्याने राबवण्याचे संकेत प्रशासनाने दिले आहेत.

शिक्षण, आरोग्य, महसूल, लोकनिर्माण, समाजकल्याण, गृह, नगरपालिका तसेच जलसंपदा विभागांमध्ये मोठ्या प्रमाणात जागा रिक्त होणार आहेत. आगामी काळात या सर्व विभागांमध्ये विविध पदांसाठी जाहिराती प्रसिद्ध होण्याची शक्यता आहे. कर्मचाऱ्यांच्या निवृत्तीमुळे पदभरतीची गती आणखी वाढणार असल्याचे संकेत समोर येत आहेत.

शिक्षण खात्यातील शिक्षक आणि शिक्षकेतर कर्मचाऱ्यांच्या मोठ्या संख्येने निवृत्तीमुळे शिक्षक, लिपिक, साहाय्यक, मदतनीस इत्यादी पदांवर लवकरच भरती प्रक्रिया अपेक्षित आहे. या पदांसाठी आवश्यक पात्रता, गुणवत्ता आणि परीक्षांचे निकष अधिसूचनेतून स्पष्टपणे जाहीर केले जातील.

नवीन भरतीसाठी स्पर्धा परीक्षा, लेखी चाचणी, मुलाखत आणि अनुभव या घटकांचा विचार होणार असल्याने इच्छुक उमेदवारांनी सज्ज राहण्याचे आवाहन प्रशासनाने केले आहे. विभागांकडून वेळोवेळी येणाऱ्या जाहिरातींचा अभ्यास करून तयारी सुरू ठेवण्याचे आवाहन करण्यात आले आहे.

गोव्यातील तरुणांसाठी ही संधी महत्त्वाची मानली जात असून, योग्य तयारी व पात्रतेच्या जोडीने सध्या उपलब्ध असलेल्या रोजगाराच्या मार्गांवर लक्ष केंद्रित केल्यास सरकारी सेवेत स्थान मिळवणे सुकर होईल, असा विश्वास व्यक्त केला जात आहे.