37th National Games: गोवा क्रीडा प्राधिकरणाच्या नियमावलीनुसार 37 व्या राष्‍ट्रीय क्रीडा स्पर्धेत गोव्यासाठी सुवर्ण, रौप्य व ब्राँझपदक विजेत्या खेळाडूस क्रीडामंत्री गोविंद गावडे यांनी अनुक्रमे प्रत्येकी तीन लाख रुपये, दोन लाख रुपये व एक लाख रुपये देण्याचे जाहीर केले आहे. मात्र सांघिक पदक विजेत्यांना वैयक्तिक पदकाच्या तीनपट बक्षीस रक्कम देण्याचा नियम आहे.

गोवा क्रीडा प्राधिकरणाच्या राष्ट्रीय क्रीडा स्पर्धा बक्षीस रक्कम नियमानुसार वैयक्तिक पदकाच्या तीनपट बक्षीस रकमेच्या हिशोबाने सांघिक गटात सुवर्णपदकासाठी नऊ लाख रुपये, रौप्यपदकासाठी सहा लाख रुपये, तर ब्राँझपदकासाठी तीन लाख रुपये द्यावे लागतील. ही रक्कम संघांतील प्रत्येक सदस्याला समप्रमाणात वितरीत करायची असते.

यजमान या नात्याने 37 व्या राष्ट्रीय क्रीडा स्पर्धेत गोव्याने पदकांचा उच्चांक नोंदविताना 27 सुवर्ण, 27 रौप्य व 38 ब्राँझपदक मिळून एकूण 92 पदके जिंकली.

सांघिक गटात गोव्याला एकूण 16 पदके मिळाली. यामध्ये आठ सुवर्ण, तीन रौप्य व पाच ब्राँझपदकांचा समावेश आहे.