अंधाऱ्या ठिकाणी लहान मुलांनी जावू नये यासाठी अनेकदा आई-वडिल त्या ठिकाणी भूत आहे असे सांगतात. भूताच्या कहाण्या तुम्हीही अनेकदा आई-वडिल, आजी-आजोबा यांच्याकडून ऐकल्या असतील. पण इथे आता भूताबद्दल सांगण्याचं प्रयोजन असं आहे की, गोव्याच्या राजकारणात मोपा विमानतळावर भुताटकी असल्याचा मुद्दा चांगलाच गाजत आहे. गोवा विधानसभेचे सध्या पावसाळी अधिवेशन सुरु आहे. अधिवेशनादरम्यान विरोधक सरकारचा अनेक मुद्यांवरुन समाचार घेत आहेत.

दरम्यान, रात्री दहानंतर मोपा विमानतळावर (Mopa Airport) गोव्यातील कर्मचारी काम करत नाही. भुताटकीमुळे लोक तिथे जाणे टाळतात, असे गोवा फॉरवर्ड पक्षाचे सर्वेसर्वा आणि आमदार विजय सरदेसाई म्हणाले.

आमदार सरदेसाईंच्या या वक्तव्यावर जीत अरोलकर यांना विचारले असता, ते पहिल्यांदा खळखळून हसले. रात्री दहानंतर मला तर मोपा विमानतळावर असे काही दिसले नाही. लोक अशा प्रकारच्या कहाण्या रंगवून सांगतात. अशा गोष्टींमध्ये काहीही तथ्य नाही. त्यांच्या या म्हणण्यामध्ये तथ्य असते तर मोपा विमानतळ आतापर्यंत बंद झाले नसते का? भुताटकीचा धोका फक्त गोव्यातील लोकानांच आहे का? बाहेरचे लोकही इथे काम करतात. त्यांना तर याचा इथे काही त्रास नाही. जर इथे असं काही असेल तर याचा सगळ्यांनाचा त्रास होईल, असे जीत अरोलकर (Jit Arolkar) म्हणाले.