गेल्या अनेक दिवसांपासून मोपा विमानतळ चांगलेच चर्चेत आले आहेत. या पार्श्वभूमीवर मुख्यमंत्री प्रमोद सावंत यांनी मोपा विमानतळाच्या कामकाजाचा आढावा घेत माध्यम प्रतिनिधींशी संवाद साधला. यावेळी गोवा व मुख्यमंत्री यांच्यासह जीएमआरचे अधिकारी ही यावेळी उपस्थितीत होते.

(GGIAL CEO Ranganathan Sheshan inform Domestic airlines seek 100 slots at Mopa )

याबाबत माहिती देताना जीएमआर गोवा आंतरराष्ट्रीय विमानतळ लिमिटेडचे (GGIAL) कार्यकारी अधिकारी रंगनाथन शेषन म्हणाले की, येत्या डिसेंबरपासून देशांतर्गत उड्डाने सुरु होणार आहेत. यासाठी सुमारे 100 उड्डाणांची मागणी डोमेस्टीक विमान कंपन्यांनी केली आहे अशी माहिती त्यांनी दिली आहे. त्यामूळे दक्षिण गोव्यातील दाबोळी विमानतळाचं भविष्य काय? असा प्रश्नपुन्हा सर्वत्र चर्चेत आला आहे.

शेषन यावेळी बोलताना म्हणाले की, विमानळावरील उड्डाणांची संख्या वाढत जाईल त्याप्रमाणे अधिक उड्डाणांसाठी परवानगी मिळू शकते. तसेच जानेवारीपासून आंतरराष्ट्रीय उड्डाणे सुरू होतील असा ही अंदाज त्यांनी व्यक्त केला आहे. सध्या विमानतळावर सुमारे 5,000 हून अधिक लोक अहोरात्र काम करत आहेत. तसेच मोपा विमानतळाचे 95% पेक्षा जास्त कामे पूर्ण झाल्याचं त्यांनी सांगितलं.

यावेळी मुख्यमंत्री सावंत यांनी माहिती दिली की, आता केवळ आणखी 15 दिवसांत उर्वरीत कामे पूर्ण होतील. ही सर्व कामे वेळेत पूर्ण झाल्यानंतर उद्गघाटनासाठी पंतप्रधान कोणती तारीख देऊ शकतात याची वाट आम्ही पाहत आहोत. तात्पुरते, आम्हाला 8 डिसेंबर नंतरच्या तारखेची अपेक्षा आहे. मात्र याबाबत पंतप्रधानच निर्णय घेतील असे ते म्हणाले.