पणजी: समाज माध्यमांवर सध्या ‘थ्रीडी डिजिटल’ फोटोंचा ‘जेमिनाय २.५ फ्लॅश इमेज’ ज्याला ‘नॅनो बनाना’ असेही संबोधले जाते, हा नवीन फोटो ट्रेंड सध्या मोठ्या प्रमाणात व्हायरल होत आहे. प्रत्येकजण आपले अशा प्रकारचे फोटो तयार करून समाज माध्यमांवर टाकत आहेत.

गुगलच्या नवीन एआय वैशिष्ट्यांचा वापर करून तयार केलेले हे फोटो हुबेहूब आणि आकर्षक दिसत असल्याने सिनेसृष्टीतील सेलिब्रिटींपासून ते राजकारण्यांपर्यंत सर्वजण या नवीन टूलचा वापर करत आहेत. मुख्यमंत्री डॉ. प्रमोद सांवत तसेच आरोग्यमंत्री विश्‍वजित राणे यांचेही जेमिनाय फोटो समाजमाध्यमांवर झळकत आहे.

आरोग्यमंत्री विश्‍वजित राणे यांनी आपल्या सोशल मीडिया हॅण्डलवरून फोटो शेअर करताना म्हटले आहे की, युवकांशी संवाद साधणे नेहमीच उपयुक्त ठरते, तो केवळ संवाद नसतो, तर एक शिकण्याचा अनुभव असतो. त्यांच्या ट्रेण्ड्सशी जुळवून घेताना मी त्यांच्याकडूनच हे शिकलो आणि हे खास त्यांच्यासाठीच शेअर करत आहे.

सध्या मोफत : मार्च महिन्यात जीपीटी ४० लॉंच झाल्यानंतर गिल्बी स्टाईल फोटोंचा ट्रेंड आला होता. त्यावेळी देखील अशाच प्रकारे सर्वजण आपले फोटो शेअर करत होते. ‘नॅनो बनाना’ फोटो तयार करणारे एआय टूल काही सेकंदात आपल्या फोटोतील बारकाव्यांसह थ्रीडी मॉडेल तयार करते.

सध्या हे टूल मोफत आहे आणि त्याचे काही फीचर्स लिमिटेड आहेत. त्यामुळे अगदी सहजपणे फोटो तयार करता येते. चेहऱ्यावरचे हावभाव, कपडे तसेच इतर बाबी अचूक टिपत असल्याने आकर्षक वाटतात. त्यामुळे हा ट्रेंड अधिक व्हायरल होत आहे.