वास्को : चिकोळणा बोगमाळो पंचायतीने कचरा व्यवस्थापन यार्डसाठी सौरउर्जेचा वापर सुरु केला आहे. असा वापर करणारी चिकोळणा बोगमाळो पंचायत गोव्यातील पहिली पंचायत ठरली असल्याचे पंचायत मंत्री माविन गुदिन्हो यांनी सांगितले. या यार्डमध्ये कचऱ्यापासून तयार होणारे सेंद्रीय खत स्थानिकांना मोफत वितरित करण्यात येणार असल्याचे गुदिन्हो यांनी सांगितले.

सौरउर्जा प्रकल्पाच्या उद्घाटनप्रसंगी मंत्री गुदिन्हो यांच्यासह सरपंच लॉरेन डिकुन्हा, उपसरपंच संकल्प महाले, पंच लक्ष्मण कवळेकर, जिल्हा पंचायत सदस्य अनिता थोरात, गटविकास अधिकारी प्रसिध्द नाईक व इतर मान्यवर उपस्थित होते. गोव्यातील सर्व पंचायतीतील साहित्य पुनर्प्राप्ती सुविधा यार्डांमध्ये सौर उर्जाचा वापर करण्यात येणार असल्याचे गुदिन्हो यांनी सांगितले.

कचरा विल्हेवाट लावावी, असे प्रत्येकाला वाटते, परंतू कचरा प्रक्रिया प्रकल्प आपल्या घराच्या परिसरात असू नये असे काहीजणांना वाटते. त्यामुळे कचरा प्रक्रिया प्रकल्प उभारताना काही वेळा अडचणी उभ्या राहतात, असे गुदिन्हो यांनी सांगितले. कचरा प्रश्नी लवकरच मुख्यमंत्री डॉ. सावंत यांच्याशी चर्चा करण्यात येणार असल्याचे त्यांनी स्पष्ट केले.