फातोर्डा: मडगाव नगरपालिकेत कार्यरत असलेले कचरावाहू कॉम्पेक्‍टर नादुरुस्त अवस्थेत आहेत. या ठिकाणी कार्यरत असलेल्या कॉम्पेक्‍टरचा कोणताही पार्ट नादुरुस्त झाल्यास दुसऱ्या कॉम्पेक्‍टरचा काढून त्याला जोडण्यात येतो, असे प्रकार नगरपालिकेत सुरू आहेत.

हे कचरावाहू कॉम्पेक्‍टर अत्यंत जुने झाले आहेत. यातील काही कॉम्पेक्‍टर दहा वर्षांपूर्वी सेवेत दाखल करण्यात आले होते आणि अधून मधून ते अनेकवेळा नादुरुस्त होण्याचे प्रकार घडत आहेत. अशाने मडगाव व फातोर्डा परिसरात योग्य पद्धतीने कचरा उचल होत नाही.

कचरा उचल उशिराने होत आहे. त्यामुळे कचरा उचल करणारे कामगार व ड्रायव्हर यांच्यावर अधिक ताण पडत आहे. यामुळे यांच्यात नाराजी पसरत आहे.

चार कॉम्पेक्‍टर; मात्र स्थिती बिकट

या नगरपालिकेत एकंदरीत चार कॉम्पेक्‍टर कार्यरत आहेत. मात्र, त्यांची स्थिती बिकट झाली आहे. याविषयी पालिकेचे मुख्यधिकारी अजित पंचवाडकर यांनी दिलेल्या माहितीनुसार, आपण नुकताच या पदाचा ताबा घेतल्याने याप्रकरणी कोणतीही माहिती नाही. तरी या प्रकरणात आपण लक्ष घालणार असल्याचे त्यांनी सांगितले. पालिकेच्या काही नगरसेवकांनीही असले प्रकार घडत असल्याचा दुजोरा दिलेला आहे.