Mapusa Market|Chavath

बार्देश: मोठ्या भक्तिभावाने व उत्साहात साजऱ्या होणाऱ्या गणेशचतुर्थीचा उत्सव अवघ्या ९ दिवसांवर येऊन ठेपल्याने गोव्याच्या इतर भागांबरोबरच म्हापशात गणेशचतुर्थीला लागणाऱ्या साहित्याच्या खरेदीसाठी लगबग सुरू झालेली आहे. गणेशचतुर्थीचा उत्सव साजरा करण्यासाठी लागणाऱ्या सामग्रीचा बाजार म्हापशात हळूहळू भरायला लागला आहे.

कुटुंबातील महिलावर्गाने चतुर्थीच्या निमित्ताने घरात विविध मिठाई, करंज्या, चकली बनवायला सुरवात केली आहे. त्याचेही साहित्य बाजारात उपलब्ध झाले आहे. विविध दुकानांवर गणेशचतुर्थीच्या निमित्ताने सजावटीसाठी लागणारी सामग्री, आतषबाजी, माळा, हार, माटोळीला बांधण्यात येणारी सामग्री (लाकडी फळे आदी), सजावटीसाठी वापरण्यात येणाऱ्या विविध रंगांच्या पताका, मकर सजावटीसाठी लागणारे साहित्य विक्रीला उपलब्ध झाले आहे.

मोठे पाट ६००० रुपयांपर्यंत

लाकडी साहित्य विक्री करणारे सुरेश गोवेकर यांनी सांगितले की, फणस, आंबा व जंगली झाडांपासून बनविलेल्या मध्यम ते मोठे पाट ३०० ते ६००० रुपये जोडी, लाटफळे ५०० रुपये जोडी, पोपट पाट जोडी १५०० रुपये, विळी ६०० ते १००० रुपये अशा दराने विकले जातात. तसेच हारतुरे विकणारे पोवळेकर यांनी सांगितले की, आमच्याकडे कागदी, प्लास्टिक, कापडी, वेस्टेरियान, पानांचे हार विक्रीस आहेत. त्यांची किंमत ५० रुपये ते १ हजार रुपयांपर्यंत आहे.