Power Cut Issue in Palolem: गोव्यात पावसाळा सुरू होताच विजेचा लपंडाव सुरू होतो. मात्र यामुळे लोकांना दैनंदिन आयुष्यात अनेक समस्यांना सामोरे जावे लागते. पाळोळेमध्ये सतत वीज जात असल्याने नागरिकांनी संताप व्यक्त केला आहे.

गावात वारंवार वीजपुरवठा खंडित झाल्यामुळे नाहक त्रास सहन करावा लागत असल्याचे मत रहिवाशांंनी व्यक्त केले आहे. सततच्या विजेच्या लपंडावामुळे वैतागलेल्या रहिवाशांनी अखेर काणकोण वीज विभागाचे सहाय्यक अभियंता गोविंद भट यांची भेट घेतली आणि त्यांनी गेल्या आठवड्यात दिलेल्या निवेदनावर कारवाई करण्याची मागणी केली.

वारंवार वीजपुरवठा खंडित होत असल्यामुळे याचा केवळ विद्युत उपकरणांवरच परिणाम होत नाही, तर आपले आर्थिक नुकसानही होत असल्याचे मत नागरिकांनी व्यक्त केले आहे.

दरम्यान, सासष्टी तालुक्यातील ग्रामीण तसेच किनारी भागातील रहिवासी विजेच्या लपंडावाने त्रस्त झाले आहेत. येथील परिसरातील वीजपुरवठा अनेकवेळा गुल्ल होण्याचा प्रकार घडत आहे. अशाने येथील रहिवाशांना उष्णतेचे चटके सहन करावे लागत आहेत. याबरोबरच येथील व्यवसायावरही विपरित परिणाम होत असल्याचे येथील व्यावसायिकांनी सांगितले.