डिचोली: पैसे घेऊन सरकारी नोकऱ्या देण्याची फसवी आश्वासनं देऊन सामान्य लोकांना लुबाडण्याचे अनेक प्रकार सध्या गोव्याच्या विविध भागांमधून समोर येत आहेत. सरकारी नोकरीच्या आशेने फसल्या गेलेल्या अनेकांनी पोलीस ठाण्यात धाव घ्यायला सुरुवात केलीये आणि यामध्ये सामील असलेल्या प्रिया यादव हिच्या विरोधात दाखल होणाऱ्या गुन्ह्यांची शृंखला अजून संपण्याचं नाव घेत नाहीये. मंगळवार (दि. १२ नोव्हेंबर) रोजी प्रिया यादवच्या विरोधात डिचोली पोलीस ठाण्यात आणखीन एक तक्रार नोंदवण्यात आली.

डिचोलीचे पोलीस उपधीक्षक जिवबा दळवी यांच्या माहितीनुसार, अशोक सोमनाथ पाणिग्रही (बोर्डे डिचोली) यांनी प्रियाच्या विरोधात गुन्हा दाखल केला आहे. वर्ष २०१७ ते २०२३ च्या दरम्यान प्रिया आणि अजय यादव यांनी डिचोलीत मालमत्ता खरेदी करणे, कोल्हापूर आणि महाराष्ट्रात दुकानं विकणे आणि मुलाला रेल्वेत नोकरी देण्याची कारणं सांगून फिर्यादयाची जवळपास १८ लाख रुपयांची फसवणूक केली.

प्रिया यादवने तक्रारदाराला वैद्यकीय खर्चाचे कारण सांगून सुद्धा सोन्याचे दागिने देण्यासाठी प्रवृत्त केल्याची तक्रार नोंदवण्यात आली आहे.

प्रिया यादव सध्या पोलिसांच्या ताब्यात आहे आणि या नवीन गुन्ह्याच्या आरोपाखाली तिच्या नावे डिचोली पोलीसांनी 'भादंसं'च्या ४२० कलमाखाली गुन्हा नोंद केला असल्याने आता तिची कोठडी आणखीन वाढणार आहे. पोलीस अधीक्षक अक्षत कौशल, उपअधीक्षक जिवबा दळवी, निरीक्षक दिनेश गडेकर, उपनिरीक्षक सोनाली हरमलकर यांच्या देखरेखीखाली पुढील तपास सुरू आहे.