मडगाव : ओबीसी आरक्षण झाले नसल्याने सरकार पंचायत निवडणुका पुढे ढकलत आहे. सरकार ओबीसी आरक्षण का करीत नाही, ते का मागे हटते, असा सवाल दक्षिण गोव्याचे खासदार फ्रान्सिस सार्दिन (Francisco Sardinha) यांनी पत्रकार परिषदेत केला. काही लोकांवरील वचपा काढण्यासाठी, काही लोकांना शिक्षा देण्यासाठी तर काही लोकांना फायदा व्हावा म्हणून जर सरकार त्या पद्धतीने आरक्षण करत नसेल तर ती चुकीची गोष्ट असल्याचे सार्दिन यांनी सांगितले. (OBC reservation in panchayat election)

सध्या ज्या पद्धतीने पंचायत निवडणुकांसाठी आरक्षण झाले आहे ते चुकीच्या पद्धतीने केले आहे. कुडतरी पंचायत प्रभाग एक हा अनुसूचित जमातीसाठी आरक्षित करण्यात आला आहे. पण या प्रभागात एकही कुटुंब या समाजातील नाही. ज्या प्रभागांमध्ये ज्या ज्या समाजाचे लोक जास्त राहतात, ते प्रभाग त्यांच्यासाठी राखीव केले पाहिजेत. बेकायदेशीररित्या केलेले आरक्षण लोक खपवून घेणार नाहीत, असा इशाराही सार्दिन यांनी दिला. (OBC reservation latest news)