Indian Super League : मुंबई सिटी, मोहन बागान, एफसी गोवा व ओडिशा एफसी या चार संघांनी इंडियन सुपर लीग (आयएसएल) फुटबॉल स्पर्धेच्या प्ले-ऑफ फेरीतील जागा निश्चित केली, बाकी दोन जागांसाठी चुरस आहे.

दोन आठवड्यांच्या आंतरराष्ट्रीय वेळापत्रकानंतर स्पर्धेला शनिवारपासून (ता. ३०) पुन्हा सुरवात होईल, तेव्हा प्ले-ऑफ फेरीतील बाकी दोन जागांसाठी चुरस असेल.

गुणतक्त्यातील सध्याच्या कामगिरीनुसार केरळा ब्लास्टर्स, पंजाब एफसी, बंगळूर एफसी, जमशेदपूर एफसी, नॉर्थईस्ट युनायटेड हे संघ अनुक्रमे पाचव्या व सहाव्या क्रमांकासाठी प्रयत्नशील आहेत.

स्पर्धेत १९ पैकी १३ सामने गमावलेल्या हैदराबाद संघ प्ले-ऑफ फेरीच्या शर्यतीतून गारद झालेला एकमेव संघ आहे.

शनिवारी बंगळूर येथे बंगळूर एफसी व ओडिशा एफसी यांच्यात, तर जमशेदपूर येथे जमशेदपूर एफसी व केरळा ब्लास्टर्स यांच्यात लढत होईल.

केरळ ब्लास्टर्सचा संघ दुसऱ्या टप्प्यात घसरला. मागील पाच सामन्यांत त्यांनी चार पराभव पत्करले असून फक्त एक विजय नोंदविला आहे.

त्यामुळे इव्हान व्हुकोमानोविच यांच्या मार्गदर्शनाखालील संघाला बाकी सर्व सामने महत्त्वाचे आहेत. सध्याच्या परिस्थितीत केरळा ब्लास्टर्सचा प्ले-ऑफ फेरीची चांगली संधी आहे.

शिल्डसाठीही चढाओढ

आयएसएल लीग विनर्स शिल्डसाठीही चुरस आहे. जमशेदपूर एफसीने संघातील खेळाडू निवडीत नियमभंग केल्यामुळे त्यांना पराभूत जाहीर करून मुंबई सिटीला विजयाचे तीन गुण बहाल करण्यात आले.

त्यामुळे माजी विजेत्यांचे सध्या सर्वाधिक ४१ गुण आहेत. त्याखालोखाल मोहन बागानचे ३९, एफसी गोवाचे ३६, तर ओडिशाचे ३५ गुण आहेत. साखळी फेरीत अव्वल ठरणारा संघ शिल्डचा मानकरी ठरेल.