पणजी : फोंड्याचे माजी आमदार लवू मामलेदार काँग्रेसच्या वाटेवर असल्याची चर्चा आहे. तृणमूल काँग्रेसमध्ये प्रवेशानंतर काही दिवसातच पक्षावर निशाणा साधत त्यांनी तृणमूलला रामराम ठोकला होता. आज मंगळवारी संध्याकाळी लवू मामलेदार काँग्रेसमध्ये प्रवेश करणार असल्याची सूत्रांची माहिती आहे. (Former MGP MLA Lavu Mamledar may join congress News Update)

लवू मामलेदार यांनी मगोत असताना निवडणूक लढवली होती. यात दोनवेळा त्यांना हारही पत्करावी लागली होती, तर एकदा मगोच्या तिकीटावर ते निवडूनही आले होते. पक्षांतर्गत वादानंतर त्यांनी भाजपच्या उमेदवारालाही पाठिंबा दिला होता. त्यानंतर काही दिवसांपूर्वी गोव्यात दाखल झालेल्या तृणमूल काँग्रेसमध्ये त्यांनी प्रवेश केला होता. मात्र मगो-तृणमूल युती झाल्याने लवू मामलेदार (Lavu Mamledar) यांनी तिथूनही काढता पाय घेतला होता.

तृणमूलमधून (TMC) बाहेर पडल्यानंतर त्यांनी अद्याप कोणताही निर्णय घेतला नव्हता. मात्र आज पत्रकार परिषद आयोजित करुन आपल्या पुढील वाटचालीची माहिती मामलेदार देणार आहेत. सूत्रांच्या माहितीनुसार लवू मामलेदार काँग्रेसच्या (Congress) वाटेवर आहेत. त्यामुळे निवडणूक जाहीर झाल्यानंतर सर्वच नेते आपपल्या जागांसाठी प्रयत्न करत असल्याचं दिसून येत आहे. असं असलं तरी मामलेदार यांच्या प्रवेशामुळे काँग्रेसच्या अंतर्गत गोटात नाराजीचं वातावरण पसरण्याची शक्यता आहे.