ST Reservation : मडगाव, राजकीय आरक्षण हा जरी अनुसूचित जमातीचा अधिकार असला तरी या प्रश्‍नावर सध्‍या राजकारणच अधिक होत आहे.

सध्‍या जे राजकारण चालू आहे ते पाहिल्‍यास समाजाचे हित साधण्‍यापेक्षा स्‍वत:चा स्‍वार्थ साधणे हेच त्‍याचे मुख्‍य इप्सित दिसते, असे प्रतिपादन मडगावचे आमदार आणि माजी मुख्‍यमंत्री दिगंबर कामत यांनी केले.

बुधवार, १५ रोजी भाजपच्‍या मडगाव येथील दक्षिण गोवा जिल्हा कार्यालयात आयोजित एका विशेष कार्यक्रमात महान आदिवासी नेते भगवान बिरसा मुंडा यांच्या जयंतीनिमित्त गोवा भाजप एसटी मोर्चातर्फे जनजाती गौरव दिन साजरा करण्यात आला. त्यांच्या प्रतिमेस पुष्पहार अर्पण करून आदरांजली वाहिली.

माजी मुख्यमंत्री व मडगावचे आमदार दिगंबर कामत हे प्रमुख पाहुणे म्हणून तर एनआरआय आयुक्त नरेंद्र सावईकर हे अध्यक्षस्थानी होते. मडगावचे नगराध्‍यक्ष दामोदर शिरोडकर हे विशेष निमंत्रित म्हणून उपस्थित होते. जिल्‍हा पंचायत सदस्‍य सुरेश केपेकर, मडगावच्‍या नगरसेविका मिलाग्रीना गोम्‍स, एसटी मोर्चाचे अध्यक्ष प्रभाकर गावकर, उपाध्‍यक्ष अँथनी बार्बोझा व अन्‍य कार्यकर्ते उपस्‍थित होते.

मुख्यमंत्र्यांवर आमचा विश्‍वास

भाजप एसटी मोर्चाचे उपाध्यक्ष अँथनी बार्बोझा यांनी गोव्यातील एसटी समुदायाशी संबंधित समस्या सोडवण्याच्या गोवा सरकारच्या भूमिकेबद्दल समाधान व्यक्त केले.

आदिवासी कल्‍याण खाते सांभाळणारे गोव्याचे मुख्यमंत्री डॉ. प्रमोद सावंत यांच्यावर आमचा पूर्ण विश्वास आहे. २०२७च्या निवडणुकीत आम्हाला आवश्यक असलेले राजकीय आरक्षण देऊन गोव्याच्या एसटी समाजाला ते पूर्ण न्याय देतील, असा विश्‍वास बार्बोझा यांनी व्‍यक्‍त केला.

केंद्रात भाजप सरकारचे नेतृत्व करणारे स्व. अटल बिहारी वाजपेयी यांनी गोव्यातील गावडा, कुणबी आणि वेळीप या तीन समुदायांना अनुसूचित जमाती म्हणून घोषित केले होते.

आमचे पंतप्रधान नरेंद्र मोदी आणि गोव्याचे मुख्यमंत्री डॉ. प्रमोद सावंत हे २०२७ च्या निवडणुकीत गोवा विधानसभेत राजकीय आरक्षण मिळविण्यासाठी एसटी समुदायांचे प्रलंबित स्वप्न पूर्ण करण्यासाठी सर्वात सक्षम व्यक्ती आहेत.

- दिभंबर कामत, आमदार