Forest Festival : झाडे लावाच, पण त्यांची काळजीही घ्या, असे प्रतिपादन बोंडला अभयारण्याचे वनपाल सुरेश खांडेपारकर यांनी कणकिरे - सत्तरी येथे केले. सरकारी प्राथमिक विद्यालय कणकिरे आणि बोंडला अभयारण्य यांच्यातर्फे आयोजित वनमहोत्सव कार्यक्रमात ते प्रमुख पाहुणे म्हणून बोलत होते.

यावेळी व्यासपीठावर वनरक्षक रामनाथ म्हाळशेकर, गुळेलीचे सरपंच नीतेश गावडे, पालक - शिक्षक संघाच्या अध्यक्ष सुफला गावडे, विद्यालयाच्या मुख्याध्यापिका नूतन उमेश गावस उपस्थित होत्या.

खांडेपारकर पुढे म्हणाले, की जेवढी झाडे आपण लावतो त्याची योग्य काळजी घेतली तर निश्चितच वनमहोत्सव साजरा करण्याचा हेतू सफल होईल. मुलांमध्ये लहानपणापासून झाडांविषयी प्रेम निर्माण व्हावे म्हणून बोंडला अभयारण्य अशाप्रकारच्या कार्यक्रमांचे आयोजन करत असते.

नूतन गावस म्हणाल्या, की झाडांमुळे आपण जिवंत आहोत. त्यासाठी आपल्याला जगण्यासाठी म्हणून तरी प्रत्येकाने दर पावसाळ्यात किमान एक तरी झाड लावावे. मुलांकडून झाडे लावून त्या त्या झाडांची काळजी संबंधित मुलाने घ्यावी.

सरपंच नीतेश गावडे व वनपाल सुरेश खांडेपारकर, नूतन गावस यांच्या हस्ते विद्यालयाच्या आवारात वृक्षारोपण करण्यात आले. मुख्य कार्यक्रमाची सुरवात तुळशीच्या झाडाला पाणी घालून करण्यात आली. एका विद्यार्थिनीने एकपात्री अभिनयाद्वारे झाडांचे महत्त्व कथन केले.