वागातोर समुद्र किनारी असलेले सार्वजनिक सुलभ शौचालय आवश्यक त्या डागडुजीअंती प्राधान्याने एका महिन्याच्या आत कार्यान्वित केले जाईल असे आश्वासन पर्यटनमंत्री रोहन खंवटे यांनी आज (24 जुलै) गोवा विधानसभेत दिले.

शिवोलीच्या आमदार दिलायला लोबो यांनी प्रश्नोत्तराच्या तासाला उपस्थित केलेल्या प्रश्नावर ते उत्तर देत होते. सुलभ शौचालय नादुरूस्त असल्यामुळे पर्यटकांना अडचणीचे ठरत आहे. त्यामुळे ते योग्य ती दुरूस्ती करून लवकर कार्यान्वित करण्याची मागणी लोबो यांनी केली होती.

मागील 14 जुलै रोजी या शौचालयाची पाहणी केली असून संबंधित कंत्राटदाराला सांगून काम लवकर पूर्ण करण्याकडे लक्ष देण्याचे अभिवचनही खंवटे यांनी दिले.

पर्यटकांसाठी दामदुप्पट दर आकारले जात असल्याचा आरोप लोबो यांनी केला व वापराविषयीचे दर फलक बाहेर लावण्याची सूचना त्यांनी पर्यटनमंत्र्यांनी केली. ती मागणी पर्यटनमंत्री खंवटे यांनी मान्य केली.

तसेच पर्यटनमंत्री खंवटे यानी सांगितले की, जर कोणी अधिक शुल्क आकारत असल्यास त्याची तक्रार 1364 या मदत वाहिनी क्रमांकावर दिल्यास योग्य कारवाई केली जाईल.

वागातोर किनारी तीन प्रसाधनगृहे असून दोघांची डागडुजी लवकर करून तिसरा गरजेचा आहे की, काय याची शहानिशा करून त्याविषयी निर्णय घेण्याचे आश्वासन खंवटे यांनी सभागृहात दिले.