Illegal Bangladeshi Nationals Arrested In Pune: अवैध पद्धतीने वास्तव्य करणाऱ्या पाच बांगलादेशी नागरिकांना पुण्यात अटक करण्यात आली आहे. गुन्हे शाखेच्या दहशतवाद विरोधी विभागाने निगडी पोलिसांच्या सहकार्याने ही कारवाई केली.

अटकेतील पाच जणांपैकी तिघांनी बनावट कागदपत्रांच्या मदतीने गोव्यातून पासपोर्ट मिळवल्याचे तपासातून उघड झाले आहे.

रॉकी सामोर बरुआ (वय 28), जयधन अमिरोन बरुआ (वय 28), अंकुर सुसेन बरुआ (वय 26), रतुल शेल्फोन बरुआ (वय 28), राणा नंदन बरुआ (वय 25) अशी अटक करण्यात आलेल्यांची नावे आहेत. सर्वजण बांगलादेशचे रहीवासी आहेत.

यातील पुण्यातील चंदननगर येथील जॉय चौधरी या नावाने ओळखला जाणारा जिकू दास सध्या फरार आहे.

दहशतवाद विरोधी सेलचे पोलीस हवालदार सुयोग लांडे यांनी निगडी पोलीस ठाण्यात तक्रार दाखल केली आहे. बांगलादेशी नागरिकांनी बनावट जन्म प्रमाणपत्रे आणि इतर बनावट कागदपत्रांद्वारे आधारकार्ड तयार केल्याची माहिती समोर आली आहे.

सर्वजण निगडीतील साईनाथनगर येथील चाळीत राहत होते, आरोपींनी आधार कार्डावरील पत्ता बदलून पुणे असा केला होता.

आरोपींपैकी तिघांनी बनावट कागदपत्रांचा वापर करून गोव्यातून यशस्वीरित्या पासपोर्ट मिळवल्याचे तपासात दिसून आले. तर इतर दोघांसाठी पासपोर्ट मिळवण्याची प्रक्रिया अद्याप सुरू आहे.