पणजी: दररोज सरासरी पाच गोमंतकीय आपले पासपोर्ट सरेंडर करतात, अशी माहिती मुख्यमंत्री डॉ. प्रमोद सावंत यांनी आमदार एल्टन डिकॉस्टा यांनी विचारलेल्या लेखी प्रश्नाच्या उत्तरातून दिली आहे.

साडेतीन वर्षांत किती गोमंतकीयांनी पासपोर्ट सरेंडर केले आहेत, असा प्रश्न करीत, त्यांची तालुका आणि मतदारसंघनिहाय माहितीही त्यांनी मागवली होती. त्यावरील उत्तरात गेल्या साडेतीन वर्षांत एकूण ६,९६० जणांनी पासपोर्ट सरेंडर केल्याचे मुख्यमंत्र्यांनी म्हटले आहे.

ही आकडेवारी पाहता, दर महिन्याला सरासरी १६६, म्हणजेच दिवसाला सरासरी पाच गोमंतकीय पासपोर्ट सरेंडर करीत असल्याचे स्पष्ट होते. दरम्यान, या काळात ज्या लोकांनी पासपोर्ट सरेंडर केले आहेत, त्यांची तालुका किंवा मतदारसंघनिहाय यादी उपलब्ध नसल्याचेही मुख्यमंत्र्यांनी म्हटले आहे.