काणकोण: मडगाव-कारवार हमरस्त्यावर माड्डीतळप येथे अज्ञात वाहनाने धडक दिल्याने पाच गुरे दगावली. ही घटना बुधवारी मध्यरात्रीनंतर घडली. हे अज्ञात वाहन मडगावच्या दिशेने जात होते. हमरस्त्यावर ठाण मांडून बसलेल्या गुरांना त्या वाहनाने ठोकरल्याने ही गुरे हमरस्त्यावर ऐसपैस पडली.

(Five cattle were killed in a collision with an unknown vehicle in goa)

सकाळी काही वाहनचालकांनी रस्त्यावर असहाय्य अवस्थेत पडलेल्या गुरांना पाणी पाजण्याचा प्रयत्न केला; मात्र तो यशस्वी झाला नाही. सध्या पंचायत निवडणुकीमुळे पंचायतीचा ताबा प्रशासकांकडे आहे. मात्र आजपर्यंत लोलये पंचायत क्षेत्रात पोळे ते तामनेपर्यंत कुठेही अपघातात गुरे मरून पडल्यास पंचायत स्वखर्चाने या गुरांची विल्हेवाट लावत होती. आता प्रशासकाने किंवा बांधकाम खात्याच्या हमरस्ता विभागाने हे काम करणे अपेक्षित होते. मात्र सकाळी १० वाजेपर्यंत ही दगावलेली गुरे रस्त्यावरून हटवली नसल्याने रस्त्यावर वाहतुकीची कोंडी होत होती. त्यामुळे माजी पंच निशांत प्रभुदेसाई यांनी स्वखर्चाने या गुरांना हटवून त्यांना दफन केले.