Fishing and Water Sports Ban Due to National Games

गोव्यात होणाऱ्या 37 व्या राष्ट्रीय खेळांसाठी राज्यात जोरदार तयारी सुरू आहे. या पार्श्वभूमीवर राज्यातील वाहतुकीत बदल करण्यात आला आहे. तसेच जिल्हा प्रशासनाने तीन समुद्रकिनाऱ्यांवर मासेमारी आणि जलक्रीडा उपक्रमांवर बंदी घालण्याची घोषणा केली आहे. मात्र या निर्णयाला निषेध करण्यात आला आहे.

यासोबतच प्रशासनाने कलम 144 देखील लागू केले आहे; ज्यामध्ये चार किंवा त्याहून अधिक व्यक्तींना एकत्र येण्यास बंदी आहे.

उत्तर जिल्हाधिकारी स्नेहा गिते यांंनी जारी केलेल्या अधिसूचनेनुसार, वायंगिणी बीच, हवाई बीच (दोना पावला) आणि शापोरा नदीवर होत असलेले रोइंग, नौकानयन, कॅनोइंग आणि कयाकिंग यांसारख्या जलक्रीडा तसेच मासेमारीवर 27 ऑक्टोबर 2023 पासून बंदी 8 नोव्हेंबर 2023 पर्यंत घालण्यात आली आहे.

गोव्यात 26 ऑक्टोबर ते 9 नोव्हेंबर 2023 या कालावधीत होणाऱ्या राष्ट्रीय खेळांमुळे सुरक्षा उपायांचा एक भाग म्हणून हा निर्णय घेण्यात आला आहे.

या आदेशाचे उल्लंघन करणाऱ्यांवर दंडात्मक कारवाईचा इशाराही देण्यात आला आहे. तसेच राष्ट्रीय खेळातील सहभागी आणि उपस्थितांच्या सुरक्षेसाठी पोलीस यंत्रणेने कडेकोट बंदोबस्त केला आहे. मात्र अचानक घेतलेल्या या निर्णयावर मासेमारी संघटनांनी निषेध वर्तवला आहे.