पणजी : म्हापसा येथील दत्तवाडी परिसरात एका घराला आग लागल्याने मंगळवारी सकाळी खळबळ उडाली. या भीषण अग्नितांडवात चार कुटुंबीयाचे सुमारे पाच लाखांचे नुकसान झाल्याची प्राथमिक माहिती आहे. अग्निशामक दलाने वेळीच आगीवर नियंत्रण मिळवल्याने मोठी दुर्घटना टळली आहे.

म्हापसा दत्तवाडीतील घरांना सोमवारी रात्री अचानक आग (Fire) लागली. आगीचं कारण अद्याप अस्पष्ट असलं तरीही आगीत घरांचं मोठं नुकसान झालं आहे. या आगीत दत्तवाडी परिसरातील 4 कुटुंबीयांचं मोठं नुकसान झालं असून सुमारे 5 लाखांचा मुद्देमाल जळून खाक झाला आहे. आग लागल्याची माहिती मिळताच म्हापसा अग्निशमन दलाचे (Fire Brigade) जवान घटनास्थळी दाखल झाले आणि त्यांनी प्रयत्नांची शर्थ करत आगीवर नियंत्रण मिळवलं. आगीवर वेळीच नियंत्रण मिळवल्याने मोठा अनर्थ टळला.

दरम्यान गोव्यात सध्या आगीच्या घटनांमध्ये मोठी वाढ झाली आहे. मुरगाव सडा येथील विद्याधर रामा नागवेकर यांच्या घराला मध्यरात्री शॉर्टसर्किटमुळे आग लागून लाखो रुपयांचे नुकसान झाले. तर फोंड्यातही (Ponda) दुर्भाट परिसरात घराला आग लागून लाखोंचं नुकसान झालं आहे. मागच्याच महिन्यात पेडण्यातील एका घराला आग लागून सुमारे तीन लाखांचं नुकसान झालं होतं. डिचोली बाजारातील दुकानाला 30 मार्च रोजी आग लागून हजारो रुपयांचे नुकसान झाले होते. अग्निशमन दलाच्या जवानांनी वेळीच धावपळ करून आग नियंत्रणात आणल्याने बाजूची अन्य दुकाने सुरक्षित राहिली.