पणजी: गोव्यातील प्रसिद्ध पर्यटन स्थळ असलेल्या वागातोर येथे एका रेस्टॉरंटमध्ये भीषण आग लागल्याची घटना समोर आली. या अचानक लागलेल्या आगीमुळे परिसरात काही काळ भीतीचे वातावरण निर्माण झाले. मिळालेल्या माहितीनुसार, रेस्टॉरंटच्या छताला लावलेल्या एका मोठ्या झुंबराला अचानक आग लागली आणि पाहता पाहता या आगीने रौद्र रुप धारण केले. आगीच्या ज्वाळा दिसताच रेस्टॉरंटमध्ये उपस्थित असलेल्या ग्राहक आणि कर्मचाऱ्यांची एकच पळापळ सुरु झाली.

घटनेची माहिती मिळताच अग्निशमन दलाच्या जवानांनी तातडीने घटनास्थळी धाव घेतली. जवानांनी अत्यंत शिताफीने आगीवर नियंत्रण मिळवण्याचे प्रयत्न सुरु केले. रेस्टॉरंटमध्ये फर्निचर आणि अन्य ज्वलनशील वस्तू असल्याने आग पसरण्याची भीती होती, मात्र अग्निशमन दलाच्या तत्परतेमुळे आग अधिक पसरण्यापूर्वीच विझवण्यात यश आले. सुदैवाने या आगीत कोणतीही जीवितहानी झाली नाही.

आग (Fire) लागली तेव्हा रेस्टॉरंटमधील लोकांना वेळेत सुरक्षित बाहेर काढण्यात यश आल्याने मोठा अनर्थ टळला. या घटनेत रेस्टॉरंटच्या मालमत्तेचे काही प्रमाणात नुकसान झाले असून आग नेमकी कशामुळे लागली याचा सखोल तपास सध्या अग्निशमन विभाग आणि स्थानिक पोलीस करत आहेत. पर्यटन हंगामाच्या पार्श्वभूमीवर अशा घटना घडल्याने हॉटेल व्यावसायिकांनी सुरक्षेच्या नियमांचे पालन करणे किती गरजेचे आहे, हा प्रश्न पुन्हा एकदा ऐरणीवर आला आहे.