Ferry Service राज्यातील फेरीसेवा सक्षम करण्यासाठी सरकारचे प्रयत्न सुरु असून, लवकरच 'रो-रो' फेरीसेवा सुरु करण्याची संकल्पना आहे, असे नदी परिवहन खात्याचे मंत्री सुभाष फळदेसाई यांनी सांगितले. डिचोलीत शुक्रवारी आयोजित 'प्रशासन तुमच्या दारी' या कार्यक्रमावेळी आले असता मंत्री फळदेसाई यांनी ही माहिती दिली.

विविध जलमार्गावर वाहतूक करणाऱ्या काही पारंपरिक फेरीबोटींवर वाहतुकीचा प्रचंड ताण येत असून, बऱ्याचदा गोंधळ आणि वादही निर्माण होत असतात. या प्रकारांवर नियंत्रण आणण्यासाठी 'रो-रो' फेरीसेवा सुरू करण्याची सरकारची संकल्पना आहे.

'रो-रो'फेरीबोटी खर्चीक असल्या, तरी येत्या सहा महिन्यात प्रायोगिक तत्त्वांवर दोन 'रो-रो' फेरीबोटी सुरू करण्यात येणार आहेत. ही संकल्पना यशस्वी ठरल्यास आणखीनही रो-रो फेरीबोटी आणण्यात येईल.

अशी माहितीही सुभाष फळदेसाई यांनी देऊन, 'रो-रो'मुळे जलमार्गावरील वाहतुकीचा ताण कमी होतानाच प्रवाशांना चांगली सेवा आणि त्यांचा वेळ वाचण्यास मदत होणार आहे. असा विश्वास व्यक्त केला. देवदेवतांची भूमी असलेला डिचोली हा भाग हा सुंदर पट्टा आहे. त्यामुळे चोडण-रायबंदर जलमार्गावर 'रो-रो' फेरीसेवा सुरू करण्यात येणार असल्याचेही त्यांनी सांगितले.