Konkani writer: मुंबई स्थित कोकणी लेखिका जयमाला दणायत यांचे आज 15 जानेवारी रोजी निधन झाले. बंगळुरू येथे ७५ व्या वर्षी त्यांनी अखेरचा श्वास घेतला. मुंबई आकाशवाणी केंद्रात कोकणी वृत निवेदिका म्हणून त्यांनी बरीच वर्षे काम केले होते. त्यांच्या निधनाने कोकणी साहित्य विश्वावर शोककळा पसरली आहे.

कोकणी भाषेतील एक सकस अशा कथा आणि निबंधकार अशी ओळख असलेल्या दणायत यांचा जन्म १७ डिसेंबर १९४७ या दिवशी जांबावली येथे झाला होता. वेगवेगळ्या कोकणी आणि मराठी नियतकालिकांमधून त्यांचें विपूल लेखन प्रसिद्ध झाले आहे. आकाशवाणीच्या मुंबई आणि पणजी केंद्रावरून त्यांचें कित्येक कार्यक्रम सादर झाले आहेत. मुंबई दूरदर्शनच्या कोकणी कौस्तुभ या कार्यक्रमात त्यांचा सहभाग होता.

दणायत यांच्या साहित्याचा शालेय अभ्यासक्रमात समावेश झाला होता. त्यांच्या कथांचे इंग्लिश आणि हिंदी भाषेत रूपांतर करण्यात आले आहे. कवासो, करबट, आंबड्या भोवती तीन शेवती, सांज सावळी ही त्यांची काही गाजलेली पुस्तके असून त्यांच्या निधनावर कोकणी भाषा मंडळाने दुःख व्यक्त करत श्रद्धांजली वाहिली आहे.