Lairai Devi देश-विदेशात प्रसिद्धीस पावलेल्या शिरगावच्या श्री लईराई देवीची जत्रा यंदा 24 एप्रिल रोजी साजरी होणार आहे. तर 25 ते 28 एप्रिलपर्यंत पारंपरिक कौलोत्सव साजरा करण्यात येणार आहे. देवस्थान समितीचे अध्यक्ष गणेश गावकर यांनी प्रसिद्धी पत्रकाद्वारे तशी माहिती दिली आहे.

शिरगावची लईराई देवी म्हणजे भक्तांचे श्रद्धास्थान. भक्तांच्या हाकेला पावणारी देवी. अशी या देवीची ख्याती आहे. लईराई देवीची जत्रा ही गोमंतकातील एक मोठी जत्रा म्हणून ओळखण्यात येते. या देवीचे गोव्यासह अन्य शेजारील राज्यात मिळून हजारो धोंड भक्तगण आहेत. जत्रोत्सवाच्या काळात लाखो भक्तगण देवीच्या दर्शनासाठी शिरगावात येतात.

भक्तगणांना आवाहन

जत्रेदिवशी होणाऱ्या होमकुंडासाठी लागणाऱ्या लाकडांची व्यवस्था देवस्थान समितीतर्फे करण्यात येत असते. तेव्हा नवसाप्रमाणे ज्या भक्तगणांना होमकुंडासाठी लाकडे द्यायची असतील, त्यांनी लाकडाच्या मोळ्या परस्पर होमकुंड स्थळी न वाहता त्यांनी देवस्थान समितीशी संपर्क साधावा. असे आवाहन देवस्थान समितीतर्फे करण्यात आले आहे.