काणकोण: आगोंद येथील स्वतःच्या पत्नीवर गोळी झाडून हत्या करणारा संशयित आरोपी आल्फ्रेड परेरा याच्या पोलिस कोठडीत पाच दिवसांनी वाढ करण्यात आली आहे. सहा दिवसांच्या पोलिस कोठडीची मुदत संपल्याने काणकोण पोलिसांनी काणकोण प्रथम सत्र न्यायालयाकडे चौकशीसाठी पांच दिवसाची कोठडी मागून घेतली.

संशयित आगोंद परिसरात ‘कासादोर भावोजी’ म्हणून परिचित आहे. आजपर्यंत त्याने अनेक वन्यजीवांचाही बळी घेतला आहे. त्यादृष्टीने तपास सुरू आहे. दरम्‍यान, आरोपीकडे बंदूक कुठून आली हा प्रश्‍‍न पोलिसांना सतावत आहे. सिंगल बोरिंग बंदुकीने गोळी झाडून संशयिताने आपली पत्नी सोनिया मोंतेरो परेरा हिचा खून केला. ही बंदूक तो गेल्‍या कित्‍येक वर्षांपासून अवैधरित्या बाळगत आहे.

आल्फ्रेड हा मूळ मळकर्णे येथील असून आगोंद येथील मोंतेरो हिच्याशी लग्न झाल्यानंतर तो सुरूवातीला तिच्याच घरी राहत होता. मात्र काही वर्षांनंतर मिरांडवाडा आगोंद येथे स्वतंत्र घर बांधून तो आपली पत्नी, 16 वर्षीय मुलगी व 5 वर्षीय मुलासोबत राहू लागला. वाहने भाडेपट्टीवर देण्याचा व्यवसाय तो गेली अनेक वर्षे आगोंद येथे करत आहे.