वास्को: वास्को वाडे ते मुंडवेल कदंब बस स्थानकापर्यंत राष्ट्रीय मार्गाची सार्वजनिक बांधकाम विभागातर्फे चालू असलेल्या खोदकामामुळे दुर्दशा झाली आहे. अंदाजे दोन किलोमीटर पेक्षा जास्त रस्ता गेल्या दोन वर्षापासून डांबरीकरणाची वाट पाहत आहे. मात्र सार्वजनिक बांधकाम विभागाचे या रस्त्यावर खोदकाम सुरू असल्याने याचा वाहन चालकाबरोबर पादचाऱ्यांना दरवेळी तारेवरची कसरत करत नाहक त्रास सहन करावा लागतो. यामुळे अनेक वेळा वाहनाना व पादचाऱ्याना अपघाताला सामोरे जावे लागते.

वास्को कदंब बसस्थानकाजवळ मुंडवेल येथे भूगटार वाहिनीसाठी पुन्हा एकदा सार्वजनिक बांधकाम भूगटार विभागाने खोदकाम करून ठेवल्याने या ठिकाणी वाहनांची गर्दी होऊन चक्का जाम होतो. याचा वाहन चालकांबरोबर पादचाऱ्यांना नाहक त्रास सहन करावा लागतो. तसेच या ठिकाणी होणाऱ्या धुळप्रदुषणानेही वाहन चालक, पादचारी तसेच स्थानिक रहिवाशांनी नाराजी व्यक्त केली आहे. सदर रस्त्यावर खोदकाम करण्यास राष्ट्रीय महामार्ग प्राधिकरण व मुरगाव नगरपालिकेची परवानगी सुद्धा नसल्याची माहिती सूत्रांकडून प्राप्त झाली आहे. मुख्यतः राष्ट्रीय रस्त्यावर खोदकाम करण्यासाठी फातोर्डा येथील राष्ट्रीय महामार्ग प्राधिकरणाची परवानगी अत्यंत महत्त्वाची आहे.मात्र सदर परवानगी नसल्याने हे काम बेकायदेशीर चालू असल्याचा आरोप स्थानिक जनतेकडून होत आहे.

सार्वजनिक बांधकाम भूगटार विभागाने पुन्हा एकदा राष्ट्रीय रस्ता मुंडवेल वास्को कदंबा बसस्थानक बाजूस खोदून रस्त्याची फारच वाईट स्थिती करून ठेवलेलीआहे.यामुळे वास्को येणाऱ्या, जाणाऱ्या वाहनां बरोबर मुरगाव बंदरातील अवजड वाहनांना वाहतुकीची समस्या निर्माण होऊ लागली आहे.गेल्या दोन वर्षापासून वास्को वाडे ते कदंबा बस स्थानक पर्यत्त राष्ट्रीय मार्गाची सार्वजनिक बांधकाम भूगटार विभागाने, संबंधित विभागाची परवानगी नसताना खोदकाम करून खड्येमय करून ठेवला आहे. यामुळे वाहनचालकांना खूपच त्रास गेल्या दोन वर्षापासून सोसावा लागत आहे.

त्यातच वास्कोत वाढत असलेली वाहनांची संख्या आणि राज्य सरकारबरोबर खाजगी आस्थापना तर्फे परवानगी नसताना तो होत असलेले रस्त्यावरील खोदकामामुळे नागरीक हैराण झाले आहे. तसेच मिळेल त्या जागी वाहन चालक वाहन पार्क करून वाहतूक पोलिसाचे नियमाचे उल्लंघन करीत असल्याचे नजरेस पडत असतात. एका प्रकारे राज्य सरकार आपल्या नियमांचे योग्यरीत्या पालन करीत नसल्याने, विविध ठिकाणी बेकायदेशीर कामे होत असल्याचा आरोप नागरिकांकडून होत आहे.