डिचोली: गावकरवाडा-मये येथे फुटलेल्या ‘त्या’ जलवाहिनीची अद्याप दुरुस्ती करण्यात आली नसल्याने पाण्याची नासाडी सुरूच आहे. विशेष म्हणजे याच जलवाहिनीच्या मुद्यावरुन बुधवारी मये गावात आंदोलन पेटले होते.

बेदरकार खनिज वाहतुकीमुळे संबंधित जलवाहिनी फुटल्याचा दावा करीत काल संतप्त नागरिकांनी गावकरवाडा येथे खनिज वाहतूक करणारे ट्रक दुपारपर्यंत रोखून धरले होते. त्यानंतर डिचोलीचे उपजिल्हाधिकारी वायंगणकर यांनी आंदोलनस्थळी भेट देऊन फुटलेल्या जलवाहिनीची पाहणी केली होती. या आंदोलनानंतर जलवाहिनीची तातडीने दुरुस्ती होणार, असा नागरिकांचा समज होता. मात्र आज (गुरुवारी) सायंकाळपर्यंत या जलवाहिनीकडे कुणी ढुंकूनही पाहिलेले नाही. दुसऱ्या बाजूने खनिज वाहतूक मात्र सुरूच आहे.

एक महिन्याहून अधिक काळापासून पाण्याची समस्या निर्माण झाली आहे. पाणी समस्येने त्रस्त केळबायवाड्यावरील महिला गेल्या आठवड्यात घागरी घेऊन खनिज वाहतुकीविरोधात रस्त्यावर उतरल्या होत्या. तर काल गावकरवाडा येथे खनिज वाहतूक करणारे ट्रक अडविण्यात आले होते.घरातील नळांना पाणी येत नसल्याने लोकांना टँकरच्या पाण्यासाठी प्रतीक्षा करावी लागत आहे. टँकरद्वारे नियमित पाणी पुरवठाही होत नाही, अशी कैफियत शारदानगर भागातील महिलांनी मांडून, पाण्याची समस्या लवकर दूर करावी, अशी मागणीकेली आहे.