देशातील प्रतिष्ठेचा ‘सीएमएस वातावरण’ फिल्म फेस्टिव्हल आज रविवारपासून पणजीत सुरू होत असून मुख्यमंत्री डॉ. प्रमोद सावंत यांच्या हस्ते या चित्रपट महोत्सवाचे उद्‌घाटन होईल.

यात चित्रपट प्रदर्शनाबरोबर गट चर्चा, चर्चासत्र, ग्रीन फिल्म मेकिंग वर्कशॉप, ऑन द स्पॉट क्यूज स्पर्धा होणार आहेत. यात 15 देशांतील 25 हून अधिक प्रतिष्ठित राष्ट्रीय आणि आंतरराष्ट्रीय तज्ज्ञ सहभागी होणार आहेत, अशी माहिती सीएमएसच्या संचालिका डॉ. वासंती राव यांनी पत्रकार परिषदेमध्ये दिली. यावेळी आययूसीएन सीईसीचे अध्यक्ष सेन सौथेयही उपस्थित होते.

सेन सौथेय म्हणाले, संपूर्ण जग विविध प्रकारच्या पर्यावरणीय समस्यांनी ग्रासले आहे. यासाठीच या पर्यावरणीय प्रश्नांसंदर्भात चर्चा करून उपाययोजना शोधण्यासाठी अशा प्रकारचे चित्रपट महोत्सव महत्त्वपूर्ण योगदान देतात. पर्यावरणीय समस्या लोकांपर्यंत आणि कायदेमंडळापर्यंत पोहोचविल्या जातात.

"महोत्सव गोवा मनोरंजन सोसायटी पणजी आणि बिट्स पिलानी कॅम्पसमध्ये होत आहे. 6 आणि 7 मार्च रोजी पर्यावरणीय चित्रपटांचे प्रदर्शन होईल. याशिवाय ‘समुद्री जीवांसमोरील संकटे’ याविषयावर गटचर्चा होईल. तर तत्काळ वन्यजीव प्रश्नमंजूषा स्पर्धा होईल. याशिवाय मोजो फिल्म वर्कशॉपचे आयोजन केले असून हे वर्कशॉप दोन दिवस चालेल."

- डॉ. वासंती राव, सीएमएसच्या संचालिका